خیبر پختونخوا میں ممکنہ سیاسی تبدیلی کیلئے اپوزیشن کی مشاورت حتمی مرحلے میں داخل ہوگئی ۔رپورٹ کے مطابق گورنر کے پی فیصل کریم کنڈی، رہنما مسلم لیگ ن امیر مقام اور سابق وزیراعلی پرویز خٹک کے درمیان غیر رسمی سیاسی مشاورت ہوئی۔ذرائع کے مطابق اس مشاورت میں جمعیت علمائے اسلام کے سربراہ مولانا فضل الرحمان بھی شامل ہوئے، ملاقات پرویز خٹک کی رہائش گاہ پر انکی ہمشیرہ کے انتقال پر تعزیت کے بعد ہوئی۔اس سلسلے میں گورنر ہائوس خیبر پختونخوا میں بھی صوبائی اپوزیشن کے ارکان اسمبلی کی جلد بڑی بیٹھک کا فیصلہ کیا گیا ہے، ملاقات کے دوران صوبائی اپوزیشن قیادت نے سینیٹ انتخابات بھی مل کر لڑنے کا اصولی فیصلہ کر لیا ہے۔دوسری جانب مولانا فضل الرحمن سے گورنر خیبرپختونخوا فیصل کریم کنڈی کی ملاقات ہوئی ہے، ملاقات میں صوبے کی سیاسی صورتحال پر مشاورت کی گئی۔ ملاقات میں وزیر اعظم کی جانب سے بنائی گئی کمیٹی کے حوالے سے قبائلی عوام کے تحفظات پر بھی تبادلہ خیال کیاگیا۔

کریڈٹ: انڈیپنڈنٹ نیوز پاکستان-آئی این پی