وفاقی و زیر پیٹرولیم علی پرویز ملک نے کہا ہے کہ و ہ گھریلو صارفین کے گیس کنکشن پر پابندی کے خاتمہ کے لیے وزیر اعظم سے ملاقات کرینگے ۔کراچی میں ایس ایس جی سی ہیڈ آفس میں خطاب کرتے ہوئے علی پرویز ملک نے کہا کہ گھریلو گیس کنکشن پر پابندی ہٹانے کے حوالے سے وزیر اعظم سے جلد ملاقات کر کے اس پر فیصلہ کریں گے۔ انھوں نے کہا وزیر اعظم سے اس سے پہلے اس حوالے سے بات کی ہے، گھریلو گیس کنکشن پورے ملک کا مسئلہ ہے۔وفاقی وزیر نے کہا کہ ملک بھر میں ڈیزل کی اسمگلنگ روکنے کے لیے اہم اقدامات کر لیے ہیں، ملک بھر میں ڈیزل لے جانے والے تمام ٹینکروں کی ڈیجیٹلائزیشن کا کام 2 ماہ مکمل ہو جائے گا، اور اگلے مرحلے میں ملک بھر میں تمام پیٹرول پمپس کو ڈیجیٹلائزڈ کرنے کا کام شروع کر دیا جائے گا۔علی پرویز ملک نے کہا کہ سرکلر ڈیٹ بڑھنے کا خدشہ ہے، بجلی پیدا کرنے والی کمپنیاں معاہدے کے تحت آر ایل این جی نہیں اٹھا رہے ہیں، بجلی پیدا کرنے والی کمپنیاں امپورٹ ہونے والی ایل این جی نہیں خریدیں گے تو سرکلر ڈیٹ میں کمی کیسے آئے گی۔

کریڈٹ: انڈیپنڈنٹ نیوز پاکستان-آئی این پی