نجی ایئر لائن کا مسافر طیارہ حادثے سے بال بال بچ گیا، رن وے پر جانے کیلئے ٹیکسی کے دوران پائلٹ کے کنٹرول سے باہر ہوگیا۔ تفصیل کے مطابق کوئٹہ سے اسلام آباد جانے والا نجی ایئر لائن کا طیارہ حادثے سے بال بال بچ گیا۔سپریم کورٹ بار کے صدر میاں رئوف عطا بھی طیارے میں سوار تھے، انہوں نے نجی ٹی وی سے گفتگو میں بتایا کہ نجی ایئر لائن کی پرواز پہلے 2 گھنٹے رن وے پر کھڑی رہی۔تاخیر کے بعد طیارے نے ٹیکسی کی تو جھٹکے لیتے ہوئے بے قابو ہوگیا، شکر ہے طیارے نے ٹیک آف نہیں کیا تھا، اس موقع پر خوف کے باعث دو مسافروں کی حالت غیر ہوگئی۔میاں رئو ف عطا نے بتایا کہ مسافر صورتحال سے پریشان ہو کر چیخنے لگے، طیارے میں سوار ایک شخص بے ہوش ہوگیا جبکہ ایک خاتون کو فوری طور پر طبی امداد فراہم کی گئی۔ان کا مزید کہنا تھا کہ نجی ایئر لائن کی لاپرواہی سے مسافروں کی زندگیاں خطرے میں پڑ گئیں، نجی ایئرلائن کی یہ پرواز کوئٹہ سے اسلام آباد کے لئے اڑ نہ سکی۔

کریڈٹ: انڈیپنڈنٹ نیوز پاکستان-آئی این پی