کورین ٹیکسٹائل کمپنی "کسکو اور پاکستانی کمپنی نے مشترکہ طور پر پاکستان کی ٹیکسٹائل صنعت کو عالمی معیار کے ٹیکسٹائل کیمیکلز اور ڈائز فراہم کرنے کیلئے تعاون کا آغاز کیا ہے۔اس اشتراک کا مقصد پاکستانی ٹیکسٹائل مصنوعات کی بین الاقوامی منڈیوں میں رسائی بڑھانا اور ایکسپورٹ کو فروغ دینا ہے۔اس حوالے سے کراچی میں ایک کانفرنس کا انعقاد کیا گیا جس میں کورین کمپنی کسکو، کورین ٹریڈ اینڈ انویسٹمنٹ ایجنسی اور پاکستانی کمپنی کے نمائندگان نے شرکت کی۔پاکستانی کمپنی کے نمائندے محمد پرویز نے کہا کہ کوریا کی اعلی معیار کی ٹیکسٹائل کیمیکلز پاکستان کی ٹیکسٹائل انڈسٹری میں بہتری اور عالمی سطح پر مسابقت بڑھانے میں اہم کردار ادا کریں گی۔کسکو کے سی ای او ڈاکٹر سنگ یونگ چو نے تقریب سے خطاب کرتے ہوئے کہا کہ پاکستان کی ٹیکسٹائل صنعت کے ساتھ پائیدار اور مضبوط شراکت داری قائم کی جائے گی۔ انہوں نے اس بات پر زور دیا کہ جدید ٹیکنالوجی کے فروغ اور عالمی پائیداری کے اہداف کو مدِنظر رکھتے ہوئے اس شراکت کو مزید وسعت دی جائے گی۔اس موقع پر کوریا کی سرکاری تجارتی ایجنسی کے ڈائریکٹر جنرل مسٹر سنگ وون ہوانگن نے پاکستان اور کوریا کے درمیان دوطرفہ تجارتی تعلقات کو مزید مضبوط بنانے کے مواقع پر روشنی ڈالی۔انہوں نے مزید کہا کہ اس اشتراک سے نہ صرف پاکستانی ٹیکسٹائل انڈسٹری کو فائدہ ہوگا بلکہ دونوں ممالک کے درمیان تجارتی تعلقات بھی نئی جہت اختیار کریں گے۔

کریڈٹ: انڈیپنڈنٹ نیوز پاکستان-آئی این پی