کوہستان میگا اسکینڈل میں پیش رفت،، سی اینڈ ڈبلیو داسو کوہستان کے ہیڈ کلرک قیصر اقبال نے پلی بارگین کیلئے احتساب عدالت میں درخواست جمع کرا دی۔نیب ذرائع کے مطابق ملزم نے اپنے بینک اکائونٹس اور اربوں روپے کے اثاثوں کا ریکارڈ بھی عدالت میں پیش کیا۔ذرائع کا کہنا ہے کہ ملزم دل، پھیپھڑوں اور کینسر کے عارضے میں مبتلا ہے اور اس وقت ایبٹ آباد میڈیکل کمپلیکس میں زیر علاج ہے، ملزم نے شدید بیماری کے باعث پلی بارگین کی درخواست منظور کرنے کی استدعا کی ہے۔نیب ذرائع کے مطابق قیصر اقبال نے واجب الادا تمام رقم ادا کرنے کی یقین دہانی کرائی ہے جبکہ اس کے 10 ارب روپے سے زائد کے اثاثے اور بینک اکائونٹس موجود ہیں، ملزم نے اپنے اثاثوں اور بینک اکائونٹس کی مکمل جانچ پڑتال کی بھی درخواست کی ہے۔ذرائع کی جانب سے مزید کہا گیا ہے کہ قیصر اقبال کی پلی بارگین کی درخواست ایک دو روز میں منظور کئے جانے کا امکان ہے۔

کریڈٹ: انڈیپنڈنٹ نیوز پاکستان-آئی این پی