کراچی حیدرآباد اور نواب شاہ میں انٹر بورڈ کے تحت سالانہ امتحانات کا پیر کے روز سے آغاز سے ہوگیا، ناظم امتحانات کے مطابق امتحانات حیدرآباد، جامشورو، مٹیاری، ٹنڈو محمد خان، بدین، ٹھٹھہ اور دادو سمیت 9 اضلاع میں منعقد ہو رہے ہیں۔ امتحانات میں ایک لاکھ 29 ہزار 904 طلبا اور طالبات حصہ لے رہے ہیں، جس کیلئے 214 امتحانی مراکز قائم کیے گئے ہیں۔۔انٹرمیڈیٹ گیارہویں اور بارہویں جماعت کے سائنس، پری انجینئرنگ، پری میڈیکل، سائنس جنرل اور ہوم اکنامکس گروپس بشمول امپروومنٹ آف گریڈ/ڈویژن، ایڈیشنل سبجیکٹس، بینیفٹ کیسز، شارٹ سبجیکٹس، ٹی پی (بارہ پرچے ) اور سپیشل چانس کے سالانہ امتحانات برائے 2025 کے پہلے مرحلے کا آغاز پیر 5 مئی سے ہو گیا ۔29 مئی 2025 تک جاری رہنے والے امتحانات میں صبح اور شام کی شفٹوں میں پرچے لئے جائیں گے ۔ صبح کی شفٹ میں صبح 9 سے 12 بجے تک سائنس پری میڈیکل، پری انجینئرنگ اور ہوم اکنامکس گروپس کے امتحانات ہوں گے جس میں 92 ہزار سے زائد طلبا و طالبات شریک ہوں گے جبکہ شام کی شفٹ میں دوپہر 2 سے شام 5 بجے تک سائنس جنرل کے امتحانات لئے جائیں گے جس میں 34 ہزار 500 سے زائد امیدوار شرکت کریں گے۔

انٹرمیڈیٹ کے سالانہ امتحانات برائے 2025 کیلئے صبح اور شام کی شفٹوں میں مجموعی طور پر 182 امتحانی مراکز قائم کئے گئے ہیں جس میں 122 امتحانی مراکز صبح کی شفٹ میں جبکہ 60 شام کی شفٹ میں بنائے گئے ہیں۔صبح اور شام کی شفٹوں میں مجموعی طور پر 36 امتحانی مراکز کو انتہائی حساس قرار دیا گیا ہے۔پرچہ آئوٹ ہونے سے روکنے کیلئے ہر پرچے میں مخصوص کوڈ شامل کیا گیا ہے، 16 سپر ویجیلینس ٹیمیں امتحانی مراکز کے دورے کر کے نگرانی کریں گی، موبائل فون، لیپ ٹاپ، ٹیبلٹس اور نقل کے مواد پر مکمل پابندی عائد کی گئی ہے، نقل میں ملوث طالب علم کو 3 سال کیلئے نااہل قرار دیا جائے گا۔دفعہ 144 کے تحت فوٹو سٹیٹ دکانیں اور غیر متعلقہ افراد پر پابندی عائد ہے، جبکہ پرچہ آئوٹ کئے جانے اور نقل کی روک تھام کیخلاف ایف آئی اے سے مدد طلب کی گئی ہے۔چیئرمین انٹربورڈ غلام علی نے خبردار کیا ہے کہ واٹس ایپ پر پرچہ اپ لوڈ کرنے والوں کے خلاف سخت کارروائی ہوگی۔دوسری جانب تعلیمی بورڈ شہید بینظیر آباد کے تحت بھی گیارہویں اور بارہویں جماعت کے امتحانات کا آغاز ہو گیا ہے۔اس حوالے سے چیئرمن تعلیمی بورڈ کا کہنا ہے کہ سانگھڑ، نوشہروفیروز اور بینظیر آباد کے 82 ہزار امیدوار امتحان دے رہے ہیں۔چیئرمین نے کہا کہ ڈویژن بھر میں 123 امتحانی مراکز قائم کیے گئے ہیں جبکہ 20 ویجیلنس ٹیمیں تشکیل دی گئی ہیں۔

کریڈٹ: انڈیپنڈنٹ نیوز پاکستان-آئی این پی