کراچی کے مختلف علاقوں میں مبینہ پولیس مقابلوں کے دوران چار ملزموں کو زخمی حالت میں گرفتار کر لیا گیا جبکہ دو فرار ہوگئے۔تفصیل کے مطابق فیروز آباد پولیس کا ملزموں سے طارق روڈ کے قریب فائرنگ کا تبادلہ ہوا، دو طرفہ فائرنگ کے تبادلے کے دوران دو ملزموں کو زخمی حالت میں گرفتار کر لیا گیا جبکہ ملزموں کے دو ساتھی فائرنگ کرتے ہوئے رات کی تاریکی کا فائدہ اٹھاتے ہوئے فرار ہونے میں کامیاب ہو گئے جن کی تلاش جاری ہے، گرفتار زخمی ملزمان کے قبضے سے اسلحہ اور موبائل فونز برآمد کر لئے گئے۔پاک کالونی میں پولیس نے مبینہ مقابلے کے بعد دو ملزموں کو زخمی حالت میں حراست میں لے لیا

گرفتار ملزموں کے قبضے سے اسلحہ، چھینے ہوئے موبائل فونز اور موٹر سائیکل برآمد کر لی۔پولیس حکام کا کہنا ہے کہ گرفتار تمام ملزموں کے خلاف مقدمات درج کر کے مزید قانونی کارروائی کی جا رہی ہے۔ دو سری جانب کراچی میں ڈیفنس کے علاقے قیوم آباد سی ایریا بس اسٹاپ پر فائرنگ سے ایک شخص زخمی ہوگیا۔ زخمی ہونے والے شخص کو چھیپا ایمبولینس کے ذریعے جناح اسپتال منتقل کیا گیا۔ پولیس کے مطابق ، زخمی ہونے والے شخص کی شناخت 26 سالہ توصیف ولد داود کے نام سے کی گئی ، واقعہ ڈکیتی کی واردات کے دوران مزاحمت پر پیش آیا ۔

کریڈٹ: انڈیپنڈنٹ نیوز پاکستان-آئی این پی