کراچی کے علاقے اورنگی ٹائون میں یو سی چیئرمین کو ان کے دفتر میں فائرنگ کرکے قتل کردیا گیا ۔پولیس کے مطابق اورنگی ٹائون کے علاقے پاکستان بازار میں یوسی چیئرمین عامر بھٹو کے دفتر میں نامعلوم افراد نے گھس کر فائرنگ کردی جس سے وہ جاں بحق ہوگئے، واردات کے بعد ملزمان باآسانی فرار ہوگئے۔پولیس حکام کے مطابق جائے وقوعہ سے شواہد اکٹھے کرنے کے ساتھ ساتھ عینی شاہدین کے بیانات بھی قلمبند کرلئے گئے ہیں۔پولیس ذرائع نے بتایا کہ جب حملہ آور عامر بھٹو کے دفتر میں پہنچے تو عامر بھٹو نے انہیں اپنے دفتر میں بٹھایا اور پانی بھی پلایا۔ اسی دوران ان کے درمیان بات چیت شروع ہوئی اور اچانک ہی انہوں نے فائرنگ کردی۔عامر بھٹو کا تعلق پیپلزپارٹی سے تھا، واقعے کے بعد سعید غنی، وقار مہدی اور دیگر رہنما عباسی شہید اسپتال پہنچے جب کہ کارکنوں کی بھی بڑی تعداد بھی جمع تھی۔صوبائی وزیر سعید غنی نے واقعہ کی مذمت کرتے ہوئے کہا کہ عامر بھٹو سرگرم کارکن تھا، لگتا ہے شہرکے بہتر ہوتے حالات کو ایک مرتبہ پھر ماضی کی طرح خراب کرنے کی سازش کی جارہی ہے، حکومت میں رہتے ہوئے ہمارے لیے ایسے واقعات باعث تشویش ہیں۔

کریڈٹ: انڈیپنڈنٹ نیوز پاکستان-آئی این پی