کراچی میں پارکنگ فیس کے نام پر لوٹنے والے مزید 12 افراد گرفتار کر لئے گئے۔کراچی کے مرکزی علاقے صدر میں پارکنگ فیس کے نام پرشہریوں کو لوٹنے والے پارکنگ مافیا کارندے قانون کے شکنجے میں آ گئے ، ریگل چوک اور عبداللہ ہارون روڈ سمیت اطراف کے علاقوں میں غیر قانونی پارکنگ فیس وصول کرنے والوں کے خلاف سخت کارروائی کی گئی ہے۔صدر میں تجاوزات اور پارکنگ مافیا کے خلاف آپریشن کرنے والے اسسٹنٹ کمشنر حاظم بھنگوار پریڈی تھانے پہنچ گئے، شہریوں کو غیر قانونی طور پر چارجڈ فیس کی مد میں لوٹنے والے پارکنگ مافیا کے خلاف خود اسسٹنٹ کمشنر نے مزید 12 مقدمات درج کرا دیے

اور مزید 12 افراد کو گرفتار کر کے تھانے منتقل کر دیا گیا۔تمام مقدمات ٹریفک پولیس کی مدعیت میں درج کروائے گئے ہیں، یہ ایکشن غیر قانونی چارجڈ فیس اور پارکنگ مافیا کے کارندوں کی جانب سے شہریوں سے بدسلوکی کے واقعات پر کیا گیا، اب تک غیر قانونی پارکنگ، چارجڈ فیس کے نام پر 40 سے زائد مقدمات اور 30 سے زائد افراد زیر حراست ہیں۔اسسٹنٹ کمشنر نے کہا تجاوزات اور پارکنگ مافیا از خود اپنا قبلہ درست کر لیں، صدر سمیت پورے شہر میں کسی قسم کی تجاوزات یا غیر قانونی پارکنگ کسی صورت قبول نہیں۔

کریڈٹ: انڈیپنڈنٹ نیوز پاکستان-آئی این پی