کراچی میں ایم اے جناح روڈ پر واقع الآمنہ پلازہ میں پٹاخوں کے گودام میں دھماکے کے واقعے کا مقدمہ پریڈی تھانے میں سرکار کی مدعیت میں درج کر لیا،دھماکے میں 5 افراد جاں بحق اور 32 زخمی ہو گئے تھے ۔ایف آئی آر میں قتل بالسبب، دھماکہ خیز مواد اور آتش گیر مادہ ذخیرہ کرنے میں غفلت برتنے سمیت دیگر دفعات شامل کی گئی ہیں۔ پولیس کے مطابق گودام کے مالک حنیف اور اس کا بھائی ایوب بھی دھماکے میں زخمی ہوئے۔ایس ایچ او پریڈی، سب انسپکٹر ایوب کے مطابق حنیف کو ابتدائی طبی امداد جناح اسپتال میں دی گئی، بعد ازاں اسے نجی اسپتال منتقل کر دیا گیا، جہاں وہ پولیس کی تحویل میں ہے۔ اسپتال میں پولیس گارڈ تعینات ہے۔تاہم حنیف کا بھائی ایوب جناح اسپتال سے غائب ہو گیا، جس کی تلاش جاری ہے۔دھماکے کے بعد جائے وقوعہ پر شدید اشتعال پایا گیا، جب آتشبازی کا سامان لے جانے والی گاڑی کو مشتعل عوام نے روک کر پتھرائو کیا، گاڑی کے شیشے توڑ دئیے اور نقصان پہنچایا، پولیس نے موقع پر پہنچ کر حالات قابو میں کیے اور گاڑی کو تحویل میں لے لیا۔

کریڈٹ: انڈیپنڈنٹ نیوز پاکستان-آئی این پی