کراچی کے علاقے پنجاب کالونی میں بجلی اور پانی کی عدم فراہمی کے خلاف دادا بائی بلڈنگ کے مکینوں نے شدید احتجاج کیا، جس کے باعث ڈیفنس موڑ کی جانب جانے والی دونوں سڑکیں ٹریفک کے لیے بند ہو گئیں۔ مظاہرین کے مطابق متعدد شکایات کے باوجود کے الیکٹرک انتظامیہ نے ان کی کوئی سنوائی نہیں کی۔ دادا بائی بلڈنگ میں واقع 80 فلیٹس کی بجلی صبح 11 بجے بند کردی گئی ، جس کے باعث مکین شدید پریشانی کا شکار ہوگئے ۔مظاہرین نے الزام عائد کیا کہ کے الیکٹرک کی ٹیم نے پنجاب کالونی اور پی این ٹی کالونی میں کنڈا مافیا کے خلاف کارروائی کی، جس کے دوران پی این ٹی کالونی میں جھگڑے کے بعد دادا بائی بلڈنگ کی بجلی بھی منقطع کر دی گئی۔مظاہرین کے مطابق کے الیکٹرک کا موقف ہے کہ جب تک جھگڑے میں ملوث افراد معافی نہیں مانگتے، بجلی بحال نہیں کی جائے گی۔ مکینوں کا کہنا تھا کہ مسئلہ کسی اور سے ہے لیکن سزا پوری عمارت کو دی جارہی ہے۔ تاہم احتجاج کے باعث ہیوی ٹریفک سمیت گاڑیوں کی طویل قطاریں لگ گئیں۔ ٹریفک پولیس کے مطابق مظاہرے کے باعث گذری انڈر پاس سے ٹریفک کو متبادل راستہ فراہم کیا گیا جبکہ کورنگی سے آنے والی گاڑیوں کو خیابان جامی کی طرف موڑا گیا۔دریں اثنا علاقہ مکینوں نے پانی وبجلی بحال ہونے کے بعد 5 گھنٹوں سے زائد احتجاج ختم کردیا۔ احتجاج ختم ہونے کے بعد ٹریفک بحال کردی گئی ۔

کریڈٹ: انڈیپنڈنٹ نیوز پاکستان-آئی این پی