کراچی میں بلدیہ اتحاد ٹائو ن محمد خان کالونی عمر بن خطاب مسجد کے قریب گھر میں فائرنگ سے 2 افراد جاں بحق اور ایک زخمی ہوگیا۔تفصیل کے مطابق جاں بحق افراد میں عتیق الرحمن اور سیف الرحمن جبکہ زخمی میں 25 سالہ ثنا گل شامل ہے۔ڈی آئی جی سائو تھ سید اسد رضا کے مطابق فائرنگ کا واقعہ اتحاد ٹائون کے اولڈ W25 اسٹاپ، مسجد امیر معاویہ کے قریب گھر کے اندر پیش آیا، پولیس نے جائے وقوعہ سے 2افراد کو حراست میں لیا ہے جبکہ نبیلہ نامی خاتون کو بھی شامل تفتیش کیا ہے۔پولیس افسر نے بتایا کہ موقع سے ایک 30 بور پستول برآمد ہوا ہے، ذاتی دشمنی کے باعث دو فریقین کے درمیان فائرنگ کا تبادلہ ہوا۔ابتدائی تفتیش کے مطابق سیف الرحمن نامی شخص خیبر پختونخوا کے ضلع ٹانک سے ایک شادی شدہ خاتون نبیلہ کو کراچی لایا۔ نبیلہ کا شوہر سنگ گل، اپنے بھائیوں مدھو اور اناری کے ہمراہ خاتون کو واپس لینے کی غرض سے جائے وقوعہ پر پہنچے، اسی دوران دونوں پارٹیوں کے درمیان فائرنگ کا تبادلہ ہوا، جس کے نتیجے میں مدھو اور سیف الرحمن دونوں موقع پر جاں بحق ہوگئے۔ڈی آئی جی سائوتھ سید اسد رضا نے بتایا کہ سیف الرحمن کا بھائی گولی لگنے سے زخمی ہوا جسے گرفتار کر لیا گیا ہے، کرائم سین یونٹ جائے وقوعہ پر موجود ہے اور شواہد اکٹھے کرنے کا عمل جاری ہے۔ڈی آئی جی ساتھ کا کہنا تھا کہ جاں بحق افراد کی لاشوں کو پوسٹ مارٹم کے لیے سول اسپتال منتقل کر دیا گیا ہے، مزید قانونی کارروائی اور فرار ملزمان کی تلاش کا عمل جاری ہے۔

کریڈٹ: انڈیپنڈنٹ نیوز پاکستان-آئی این پی