نیوکراچی بلال کالونی میں پولیس مقابلیکے دوران خاتون کے جاں بحق ہونے کے واقعے میں 4 پولیس اہلکاروں کو حراست میں لے لیا گیا۔ پولیس حکام کا کہنا ہے کہ نیو کراچی بلال کالونی سیکٹر فائیو ڈی میں موٹر سائیکل سوار دو ملزمان شہری سے لوٹ مار کررہے تھے کہ اس دوران گشت پر مامور پولیس اہلکار وہاں پہنچ گئے، پولیس اہلکاروں کو دیکھتے ہی ملزمان نے فائرنگ کردی جس پر اہلکاروں کی جوابی فائرنگ سے ایک ملزم زخمی ہوگیا جب کہ اس کا ساتھی موقع سے فرار ہوگیا۔ پولیس حکام کے مطابق فائرنگ کے تبادلے میں ایک خاتون جاں بحق ہوگئی جس کی شناخت حمیدہ کے نام سے کی گئی، خاتون اپنے شوہر کے ہمراہ قریبی قائم میڈیکل اسٹور پر آئی تھی۔ پولیس حکام کا کہنا ہے کہ مقابلے میں حصہ لینے والے 4 پولیس اہلکاروں کو حراست میں لے لیا گیا ہے، اہلکاروں کا تعلق شاہین فورس سے ہے، زیر حراست اہلکاروں سے مقابلے سے متعلق پوچھ گچھ کی جارہی ہے تاہم خاتون ڈاکوں کی فائرنگ سے جاں بحق ہوئی یا پولیس اہلکاروں کی کچھ کہنا قبل از وقت ہے۔ پولیس حکام نے بتایا کہ واقعے کی تحقیقات کی جائیں گی کہ خاتون کس کی گولی سے جاں بحق ہوئی۔

کریڈٹ: انڈیپنڈنٹ نیوز پاکستان-آئی این پی