کراچی کے علاقے کورنگی بلال کالونی میں شوہر نے سفاکیت کا مظاہرہ کرتے ہوئے بیوی کو تیزاب پلاکر قتل کردیا۔تفصیل کے مطابق کراچی کے علاقے کورنگی میں ایک افسوسناک واقعہ پیش آیا جہاں شوہر نے اپنی بیوی دو بیٹیوں کی ماں کو مبینہ طور پر تیزاب پلا کر قتل کردیا۔نور عائشہ نامی خاتون کو جناح اسپتال منتقل کیا تھا، تشویشناک حالت میں پہنچنے والی خاتون اسپتال میں دم توڑ گئی جس کے بعد کورنگی انڈسٹریل ایریا پولیس نے مقدمہ درج کرکے تفتیش کا آغاز کیا ہے۔نور عائشہ کے والد نے شوہر ایوب اور دیور رفیق پر تیزاب پلاکر مار ڈالنے کا الزام لگایا ہے، والد نے اپنے بیان میں کہا کہ مقتولہ نور عائشہ کی شادی 7 سال قبل ایوب سے ہوئی تھی نور عائشہ کی دو کمسن بیٹیاں 4 سالہ مصباح 2 سالہ عربو بھی ہیں۔والد کا کہنا ہے کہ داماد ایوب مختلف خواتین سے اپنے تعلقات رکھتا تھا، والد نے الزام لگایا کہ داماد کے ناجائز تعلقات پر اکثر جھگڑے ہوتے تھے، 4 جولائی کو اطلاع ملی داماد اور اس کے بھائی نے بیٹی کو تیزاب پلادیا تیزاب پلانے اور مارپیٹ کے بعد بیٹی کو جناح اسپتال منتقل کیا گیا۔والد نے کہا کہ بیٹی دوران علاج انفیکشن ہونے کی وجہ سے دم توڑ گئی، مقدمے کے متن کے مطابق ڈاکٹروں نے تیزاب کی وجہ سے انفیکشن اور موت کی تصدیق کی ہے، پولیس نے مقدمہ درج ہونے کے بعد ملزمان کی تلاش شروع کردی۔

کریڈٹ: انڈیپنڈنٹ نیوز پاکستان-آئی این پی