ورچوئل ایسٹس ریگولیٹری اتھارٹی کے تاریخی اقدام کے باعث پاکستان بین الاقوامی ڈیجیٹل مارکیٹ کی توجہ کامرکز بن گیا ۔ورچوئل ایسٹس ریگولیٹری اتھارٹی پاکستان کی جانب سے کیپٹل مارکیٹس کو مضبوط بنانے کے لیے فوری اور متحرک اقدامات کئے جا رہے ہیں۔پاکستان ورچوئل ایسٹس ریگولیٹری اتھارٹی کے چیئرمین بلال بن ثاقب کی سابق بائننس سی ای او چانگ پینگ ژا اور بلاک چین پلیٹ فارم ٹرون کے بانی جسٹن سن سے اہم ملاقات ہوئی۔سابق بائننس سی ای او چانگ پینگ ژا کا کہنا تھا کہ پاکستان نے کرپٹو ریگولیشن میں تیزی سے ترقی کے ساتھ ساتھ پاکستانی نوجوان طبقہ کے لیے منظم اور محفوظ کرپٹو اپنانے کے مواقع فراہم کیے۔انہوں نے کہا کہ پاکستان کا نوجوان طبقہ پیشہ ورانہ صلاحیت، جدت اور نئی ٹیکنالوجیز اپنانے میں ماہر ہے، پاکستان سب سے زیادہ کرپٹو صارفین رکھنے والی آبادی میں دنیا کے تین بڑے کرپٹو ممالک میں شامل ہے۔

چانگ پینگ ژا نے مزید کہا کہ پاکستان کی اسٹاک مارکیٹ کو ٹوکنائز کرنے سے عالمی سرمایہ کاری میں خاطر خواہ اضافہ اور ملکی معیشت مستحکم ہوگی۔جسٹن سن کا کہنا تھا کہ کرپٹو کی بدولت ہر شہری کے لیے آسان اور مساوی مالی رسائی حاصل ہو سکے گی، کرپٹو کرنسی کے ذریعے پاکستان کے معاشی نظام کو مزید قوی، جدید اور شفاف بنا رہے ہیں۔یہ اہم ملاقاتیں پاکستان کے ابھرتے ہوئے انقلابی ڈیجیٹل اثاثہ جات کے فریم ورک پر بڑھتی ہوئی بین الاقوامی توجہ کی عکاسی کرتی ہیں، پاکستان کی ریگولیٹری پالیسی اور طویل المدتی صلاحیت پر عالمی کرپٹو لیڈرز کا بڑھتا ہوا اعتماد ملکی معیشت کی اونچی اڑان کا مظہر ہے، کرپٹو کے مثالی اقدام سے پاکستان میں غیر ملکی سرمایہ کاری، ریمیٹنس اور مالیاتی ذخائر میں خاطر خواہ اضافہ ممکن ہوگا۔

کریڈٹ: انڈیپنڈنٹ نیوز پاکستان-آئی این پی