وزیراعلی پنجاب مریم نواز شریف نے کہا ہے کہ کشمیر اور پاکستان لازم و ملزوم ہیں، کوئی جدا نہیں کر سکتا، مقبوضہ کشمیر میں آزادی کی روشن صبح ضرور طلوع ہوگی۔مقبوضہ جموں و کشمیرپر بھارت کے غاصبانہ قبضے کے خلاف یوم سیاہ پر خصوصی پیغام میں وزیراعلی مریم نواز شریف کا کہنا تھا کہ 27 اکتوبر کو مقبوضہ جموں و کشمیر پر بھارت کے غاصبانہ قبضے کا اقدام تاریخ عالم کا سیاہ باب ہے،27 اکتوبر کے سیاہ باب کی سیاہی بھارتی قیادت کے چہرے پر نمودار ہو رہی ہے۔انہوں نے کہا کہ مسئلہ کشمیر کسی ایک ملک کا نہیں بلکہ اقوام عالم کا مسئلہ بن چکا ہے، پاکستان ہمیشہ مقبوضہ جموں و کشمیر کے بھائیوں کی اخلاقی اور سفارتی حمایت کی پالیسی پر عمل پیرا رہے گا۔ان کا کہنا تھا کہ پاکستان نے آپریشن بنیان مرصوص میں بھارت کا غرور خاک میں ملا دیا، بھارتی قیادت بنیان مرصوص کی شرمندگی کے باعث وزیراعظم محمد شہبازشریف کا سامنا کرنے سے قاصر ہے، امریکی صدر کا وزیراعظم محمد شہبازشریف اور فیلڈ مارشل حافظ عاصم منیر کو عظیم قرار دینا بھارت کے لئے ایک اور شکست کے مترادف ہے۔مریم نوازشریف نے مزید کہا کہ کشمیر اور پاکستان لازم و ملزوم ہیں، کوئی جدا نہیں کرسکتا، کشمیری بھائیوں کے ساتھ ہیں اور ہمیشہ رہیں گے، لاکھوں بے گناہ کشمیریوں کا خون ضرور رنگ لائے گا، مقبوضہ کشمیر میں آزادی کی روشن صبح ضرور طلوع ہوگی۔

کریڈٹ: انڈیپنڈنٹ نیوز پاکستان-آئی این پی