بھارتی جارحیت کے دوران شہید ہونے والے پاکستانیوں کی غائبانہ نماز جنازہ ضلع قصور کے علاقے کھڈیاں خاص میں ادا کر دی گئی۔نماز جنازہ میں سپیکر پنجاب اسمبلی ملک محمد احمد خان، وفاقی وزیرِ مملکت ملک رشید احمد خان اور رکنِ صوبائی اسمبلی ملک سعید احمد خان نے بھی شرکت کی، اس موقع پر اعلی فوجی افسران، بیوروکریٹس اور پولیس افسران سمیت ہزاروں شہری بھی موجود تھے۔نماز جنازہ کا انعقاد کھڈیاں خاص کے ہائی سکول میں کیا گیا، جہاں پاک افواج اور قوم کے شہدا کے ایصالِ ثواب کیلئے خصوصی دعا کی گئی۔غائبانہ نماز جنازہ کے بعد پاکستانی قوم کی یکجہتی اور شہدا کے اہل خانہ کے ساتھ اظہارِ تعزیت کا پیغام دیا گیا اور اس موقع پر ملکی سلامتی اور امن کے لئے دعائیں بھی کی گئیں۔سپیکر پنجاب اسمبلی ملک محمد احمد خان نے کہا کہ پاکستانی قوم اپنے شہدا کو کبھی نہیں بھولے گی، اور ہم ان کی قربانیوں کو ہمیشہ یاد رکھیں گے۔ان کا مزید کہنا تھا کہ پاکستان کی سلامتی اور بقا کیلئے ہر طرح کی قربانی دینے والے ہمارے بہادر سپاہی قوم کے ہیرو ہیں۔

کریڈٹ: انڈیپنڈنٹ نیوز پاکستان-آئی این پی