لاہور ہائیکورٹ میں سابق وزیر خارجہ اور رکن قومی اسمبلی بلاول بھٹو زرداری کی نااہلی کے لیے دائر اعتراض شدہ درخواست پر سماعت ہوئی، عدالت نے درخواست گزار کو اعتراضات دور کرنے کی ہدایت جاری کر دی۔جسٹس خالد اسحاق نے شہری اشبا کامران کی جانب سے دائر کی گئی درخواست پر سماعت کی، جس پر عدالت کے رجسٹرار آفس نے قابل سماعت ہونے کے حوالے سے اعتراض عائد کیا تھا۔ سماعت کے دوران درخواست گزار نے عدالت کو یقین دلایا کہ وہ جلد آفس کے اعتراضات دور کر دیں گے۔عدالت نے رجسٹرار آفس کو ہدایت کی کہ اگر اعتراضات دور کر دیے جائیں تو کیس کو نمبر الاٹ کیا جائے۔ درخواست میں مقف اختیار کیا گیا ہے کہ بلاول بھٹو زرداری بیک وقت پاکستان پیپلز پارٹی اور پیپلز پارٹی پارلیمنٹیرینز کے رکن ہیں، جو کہ الیکشن ایکٹ کی خلاف ورزی ہے۔ درخواست گزار کا کہنا ہے کہ الیکشن ایکٹ کے تحت کوئی بھی شخص بیک وقت دو سیاسی جماعتوں کا رکن نہیں ہو سکتا، لہذا بلاول بھٹو قومی اسمبلی کی رکنیت کے اہل نہیں۔ عدالت سے استدعا کی گئی ہے کہ اسپیکر قومی اسمبلی کو بلاول بھٹو کی نااہلی کے لیے ریفرنس بھیجنے کی ہدایت کی جائے۔عدالت نے مزید کارروائی اعتراضات کے ازالے سے مشروط کرتے ہوئے کیس کی سماعت موخر کر دی۔

کریڈٹ: انڈیپنڈنٹ نیوز پاکستان-آئی این پی