علامہ اقبال انٹرنیشنل ایئرپورٹ لاہور پر منشیات اسمگلنگ کی کوشش ناکام بنادی گئی، اینٹی نارکوٹکس فورس نے نائجیرین مسافر کو گرفتار کر کے اسمگلر کے پیٹ سے 38 کوکین کیپسول برآمد کرلئے۔ ترجمان اے این ایف کے مطابق برآمدہ کیپسولز سے 646 گرام کوکین برآمد ہوئی، لاہور آمد پر مشتبہ مسافر کو حراست میں لیکر اسپتال منتقل کیا گیا۔ترجمان کا کہنا ہے کہ ملزم بذریعہ غیر ملکی پرواز، بحرین سے "بزنس ویزہ پر لاہور پہنچا تھا، ملزم کیخلاف انسداد منشیات ایکٹ کے تحت مقدمہ درج کر کے مزید تحقیقات کا آغاز کر دیا گیا ہے۔ترجمان کے مطابق بیرون ممالک سے منشیات اسمگلنگ کے بڑھتے کیسز معاشرے کیلئے خطرناک ہے، غیر ملکی باشندوں بالخصوص نائجیرین اور افغان شہریوں کی منشیات اسمگلنگ کیسز میں گرفتاری تشویشناک ہے۔اے این ایف وزارت خارجہ کے ذریعے متعلق ممالک کے ساتھ منشیات اسمگلنگ کے انسداد کیلئے اقدامات اٹھا رہی ہے۔

کریڈٹ: انڈیپنڈنٹ نیوز پاکستان-آئی این پی