لودھراں میں ایک مدرسے میں مبینہ زہریلا کھانا کھانے سے9بچے شدید متاثر ہو گئے جن میں سے ایک 8 سا لہ بچہ جاںبحق جبکہ 7 طلبا کی حالت غیرہوگئی جو ضلعی اسپتال میں زیر علاج ہیں ۔تفصیل کے مطابق مدرسہ تفہیم القرآن لودھراں میں زیر تعلیم 10 طلبا مبینہ طور پر زہریلا کھانا کھانے سے بیمار ہو گئے تھے، جنہیں فوری طور پر ضلعی اسپتال منتقل کیا گیا۔ان میں سے 8 سالہ ایان آصف کو تشویشناک حالت کے باعث بہاولپور وکٹوریا اسپتال ریفر کیا گیا، تاہم وہ جانبر نہ ہو سکا۔ایان آصف کا تعلق بندرہ پلی، بہاولپور سے تھا اور وہ قرآن حفظ کرنے کی غرض سے مدرسے میں داخل ہوا تھا۔واقعے کی اطلاع پر سٹی پولیس بہاولپور موقع پر پہنچ گئی

جبکہ ڈی ایس پی صدر سرکل عابد حسین بھلہ نے مدرسے کے مختلف شعبہ جات کا دورہ کیا اور واقعے کی ابتدائی تحقیقات کا آغاز کیا۔فوڈ اتھارٹی کی ٹیم نے مدرسے کے کھانے اور پانی کے نمونے حاصل کر لیے ہیں، جنہیں تجزیے کے لیے لیبارٹری بھیجا گیا ہے۔ڈی ایس پی کے مطابق واقعے میں ملوث ذمہ داران کے خلاف مقدمہ درج کرنے کی کارروائی جاری ہے اور تحقیقات مکمل ہونے کے بعد سخت قانونی کارروائی عمل میں لائی جائے گی۔ضلعی اسپتال ذرائع کے مطابق زیرِ علاج 9 طلبا میں سے 2 کو صحت یاب ہونے پر ڈسچارج کر دیا گیا ہے، جبکہ باقی 7 بچوں کا علاج جاری ہے۔

کریڈٹ: انڈیپنڈنٹ نیوز پاکستان-آئی این پی