وزیراعظم محمد شہبازشریف نے معرکہ حق میں تاریخی فتح کے حوالہ سے وزیراعظم ہائوس کے سبزہ زار میں قومی پرچم لہرا یا ۔ پرچم کشائی کی تقریب جمعہ کو یوم تشکر کے موقع پروزیراعظم ہائوس کے سبزہ زار میں منعقد ہوئی ۔سبز ہلالی پرچم کو لہرانے کے بعد وزیراعظم محمد شہبازشریف نے قومی پرچم کو خصوصی سلامی دی ۔ اس موقع پر وزیر اعطم شہباز شریف نے کہا کہ بھارت کی کھلی جارحیت اور اشتعال انگیزی کے خلاف پاکستان کی شاندار کامیابی اور فتح پر اللہ تعالی کا شکر بجا لانے کے لئے ملک بھر میں یوم تشکر منایا جا رہا ہے۔انہوں نے کہا کہ 6 اور 7 مئی کی درمیانی شب بھارت نے بزدلی کا مظاہرہ کرتے ہوئے پاکستان پر حملہ کر دیا جس کے نتیجے میں معصوم اور بے گناہ پاکستانی شہری شہید ہوئے اور ہمیں ان بے گناہ شہریوں کی خاطر جوابی کارروائی کرنے پر مجبور کردیا۔وزیراعظم نے کہا کہ پاکستان ایک پر امن ملک ہے لیکن ہم اپنے دفاع میں بھرپور جوابی کارروائی کا حق محفوظ رکھتے ہیں، پاکستان کی بہادر اور پیشہ وارانہ مسلح افواج نے دشمن کو اسی کی زبان میں مثر اور بھرپور جواب دے کر عسکری تاریخ کا سنہرا باب رقم کیا ہے۔

کریڈٹ: انڈیپنڈنٹ نیوز پاکستان-آئی این پی