پرائیڈ آف پرفارمنس، ستارہ امتیاز پانے والے اردو کے معروف افسانہ نگار، نثر نگار و مصنف اشفاق احمد کی 19ویں برسی(آج) 7ستمبر کومنائی جائے گی۔اس موقع پر مختلف شہروں میں خصوصی تعزیتی تقریبات، ریفرنسز، کانفرنسز، سیمینارزاور دیگر تقریبات کا بھی انعقاد کیا جائے گا جن میں اشفاق احمد مر حوم کی اردو ادب کے حوالے سے طویل خدمات کو شاندار الفاظ میں خراج عقیدت پیش کیا جائے گا۔اس دن کی مناسبت سے قرآن خوانی کی محافل بھی منعقد کی جائیںگی اور مرحوم کی روح کو ایصال ثواب کیلئے فاتحہ خوانی کی جائے گی۔افسانہ نگار ونثر نگار،مصنف، ریڈیو پاکستان کے مشہور کردار تلقین شاہ سے شہرت حاصل کرنے والے اشفاق احمد 22اگست1925 کو پیدا ہوئے انہوں نے لاہور کے علاوہ اٹلی،فرانس اور نیویارک کی یونیورسٹیوں سے اعلی تعلیم حاصل کی۔اشفاق احمد کا شمار سعادت حسن منٹو اور کرشن چندر کے بعد ادبی افق پر نمایاں رہنے والے افسانہ نگاروں میں ہوتا ہے،انہوں نے اپنے ایک مشہور افسانے گدڑیا سے غیر معمولی شہرت حاصل کی اس کے علاوہ ایک محبت سو افسانے،من چلے کا سودا،سفر در سفر،کھیل کہانی،طوطا کہانی اور دیگر ان کی معروف تصانیف ہیں۔اشفاق احمد نے زندگی کا بیشتر حصہ ریڈیو پاکستان میں گزاراانہوں نے 1965 میںریڈیو پاکستان لاہور سے ایک فیچر پروگرام کا آغاز کیا جس کا اہم ترین کردار تلقین شاہ اشفاق نے ادا کیا عوام کو تلقین شاہ کا مخصوص لہجہ اور دھیمہ پن ملک کے دور دراز قصبات اور دیہاتوں میںآج بھی یاد کیا جاتا ہے۔انہیں پرائڈ آف پرفارمنس اور ستارہ امتیاز کے ایوارڈز سے نوازا گیا۔اردو ادب کا یہ عظیم افسانہ نگار 7ستمبر 2004 کو 79برس کی عمر میں اس دنیا سے ہمیشہ کیلئے رخصت ہو گیا۔

کریڈٹ: انڈیپنڈنٹ نیوز پاکستان-آئی این پی