وفاقی وزیر خزانہ سینیٹر محمد اورنگزیب نے کہا ہے کہ مختلف معاشی شعبوں اور مارکیٹوں سے کارٹلائزیشن کے خاتمہ کے لیے سخت اقدامات کیے جائیں۔ وزیر خزانہ محمد اورنگزیب نے کمپٹیشن کمیشن کا دورہ کیا اور اس دوران انہوں نے کمیشن کی کارکردگی پر تفصیلی بریفنگ لی۔اس موقع پر محمد اورنگزیب نے گفتگو کرتے ہوئے کہا کہ چیف جسٹس سے درخواست کریں گے کہ سپریم کورٹ میں کمپٹیشن سے متعلق مقدمات پر خصوصی بینچ بنائیں، جن مقدمات میں حکومت کے ریونیو موجود ہوں، ان پر سپریم کورٹ معاونت کرے۔انہوں نے کہا کہ جیسے ٹیکس سے متعلق مقدمات میں جسٹس یحیی نے مدد کی، کمپٹیشن مقدمات میں بھی معاونت کریں گے، مقدمات کی پیروی کے لئے کمپٹیشن کمیشن ملک کے بہترین وکلا کی خدمات حاصل کرے۔وفاقی وزیر نے کہا کہ حکومت کارٹلائزیشن کے خاتمہ کے لئے کمپٹیشن کمیشن کومکمل سپورٹ فراہم کرے گی، مارکیٹوں کی مانیٹرنگ کے لئے جدید تکنیک اور ڈیٹا کا استعمال کریں، مارکیٹ ڈیٹا کا انالسز اور مانیٹرنگ کر کے کارٹلز کو پکڑا جائے، کمپٹیشن کمیشن مارکیٹ میں گٹھ جوڑ کے خلاف جاری انکوائریوں کو جلد مکمل کرے۔ انکا کہنا تھا کہ کارٹل کے خلاف حاصل کیے گئے ثبوتوں کی جلد فرانزک کے لئے ڈی جی ایف آئی اے سے بات کروں گا، تمام ریگولیٹری اور لا انفورسمنٹ اداروں باہم ہم آہنگی سے بہتر نتائج دے سکتے ہیں۔محمد اورنگزیب نے کہا کہ مارکیٹوں میں شفافیت اور مقابلہ کا ماحول فراہم کرنے کے لئے حکومت کمیشن کو ہر قسم کا سپورٹ کرے گی، کمپٹیشن کمیشن کو مضبوط بنیادوں پر کھڑا کرنے کے لئے آٹومیشن کی جائے، حکومتی ادارے کمپٹیشن کیشن کی مختلف شعبوں کی ریسرچ رپوٹوں سے استفادہ حاصل کریں۔انہوں نے مزید کہا کہ پالیسی واضح ہے کہ جو کاروبار نجی شعبے کے کرنے کے ہیں، حکومت ان میں شامل نہیں ہو گی، کمپٹیشن کمیشن کی کارکردگی کافی بہتر ہے، لیکن کمیشن کو مزید فعال بنائیں۔

کریڈٹ : انڈیپنڈنٹ نیوز پاکستان-آئی این پی