سپیشل جج انسداد دہشت گردی ملک اعجاز آصف نے سابق وزیر داخلہ شیخ رشید احمد اور ان کے بھتیجے شیخ راشد شفیق کی 9 مئی واقعات کے دیگر مقدمات میں عبوری ضمانت قبل از گرفتاری ذاتی مچلکوں پر منظور کر لی اور سرکار کو 18 نومبر کے لئے نوٹس جاری کر دیا۔ جمعہ کے روز سپیشل جج انسداد دھشت گردی ملک اعجاز آصف کے روبرو 9 مئی تصادم واقعات کے باعث سابق وزیر داخلہ شیخ رشید احمد اور ان کے بھتیجے شیخ راشد شفیق کے خلاف درج کیسز کی سماعت ہوئی۔دوران سماعت شیخ رشید احمد اور راشد شفیق عدالت میں پیش ہوئے۔سائلان کی طرف سردار عبدالرازق خان ایڈووکیٹ نے پیروی کی۔سردار عبدالرازق خان ایڈووکیٹ نے اپنے دلائل میں کہا کہ شیخ رشید اور راشد شفیق کو 9 مئی کے تمام مقدمات میں تتمہ بیانات کے ذریعے 29 ستمبر کو ملزم نامزد کیا گیا تھا۔ایک ہی دن کے تمام مقدمات میں شیخ رشید اور راشد شفیق کا نام ڈالنا سیاسی انتقام اور اختیارات کے ناجائز استعمال کی بدترین مثال ہے ۔قانون میں تتمہ بیان کی کوئی حثیت نہیں ہے۔ سردار عبدالرازق نے کہا کہ شیخ رشید کی رٹ پیٹشن پر آئی پنجاب نے ہائیکورٹ میں بیان دیا تھا کہ ان کے خلاف کوئی مقدمہ نہیں مگر ان کی گرفتاری کے بعد تتمہ بیانات کے ذریعے انہیں جھوٹے مقدمات میں بے گناہ ملوث کردیا گیا ہے۔شیخ رشید تو نو مئی کے واقعات کی متعدد بار مزمت کرچکے ہیں۔جس پر فاضل عدالت نے دونوں کے جملہ مقدمات میں ذاتی مچلکوں پر عبوری ضمانت 18 نومبر تک منظور کرلی۔

کریڈٹ: انڈیپنڈنٹ نیوز پاکستان-آئی این پی