مشیر اطلاعات خیبرپختونخوا بیرسٹر ڈاکٹر سیف نے کہا ہے کہ پاک فوج نے مشرقی سرحد پر بھارت کو منہ توڑ جواب دے کر اس کا غرور خاک میں ملا دیا ہے، مغربی سرحد پر بھارت کی بی ٹیم دہشت گردوں کو بھی شکست دیں ۔اپنے بیان میں بیرسٹر سیف کا کہنا تھا کہ خیبرپختونخوا پولیس سمیت تمام سکیورٹی ادارے بھارت کی اے اور بی ٹیموں کے خلاف متحد ہیں۔انہوں نے کہا کہ بھارت خیبرپختونخوا میں دہشتگردوں کی پشت پناہی میں ملوث ہے، امن دشمن عناصر سے آہنی ہاتھوں سے نمٹا جائیگا، دہشت گردی کیخلاف پولیس اہلکاروں کی قربانیاں ہرگز رائیگاں نہیں جائیں گی، خیبرپختونخوا پولیس دہشت گردوں کا ڈٹ کر مقابلہ کر رہی ہے۔صوبائی مشیر اطلاعات کا کہنا تھا کہ بھارت کی بی ٹیم کو سر اٹھانے نہیں دیا جائے گا، دہشت گردوں نے گزشتہ روز پشاور میں پولیس اہلکاروں کو نشانہ بنایا، خیبر پختونخوا حکومت دھماکے میں شہید اہلکاروں کے لواحقین کے غم میں برابر کی شریک ہے، واقعے میں ملوث عناصر کو کیفرِ کردار تک پہنچایا جائے گا۔

کریڈٹ: انڈیپنڈنٹ نیوز پاکستان-آئی این پی