پاکستان ایئر فورس (پی اے ایف)کے پائلٹ نے میانوالی صدر پولیس کے پاس ایک خاتون کے خلاف مقدمہ درج کروایا ہے، جس میں انہوں نے الزام لگایا ہے کہ شادی سے انکار کرنے پر خاتون انہیں بلیک میل کر رہی ہے۔ میڈیا رپورٹ کے مطابق یہ پائلٹ جو ایم ایم عالم پی اے ایف میانوالی ایئربیس پر تعینات ہے، نے خاتون الف کے خلاف ایف آئی آر نمبر 232/25 درج کروائی ہے، مقدمے میں پاکستان پینل کوڈ (پی پی سی) کی دفعات 419، 420، 500، 506، 211 اور ٹیلی گراف ایکٹ 1985 کی دفعہ 25-ڈی شامل ہیں، خاتون کا تعلق چاہ حمیدوالا، گدائی شمالی، تحصیل ڈیرہ غازی خان سے ہے۔مدعی نے بیان دیا کہ جب وہ میانوالی بیس پر تعینات تھا تو اس کا سوشل میڈیا پر ایک خاتون سے رابطہ ہوا جس نے خود کو ملتان کی رافعہ کے طور پر متعارف کروایا۔انہوں نے بتایا کہ سوشل میڈیا پر بات چیت کے دوران خاتون نے دعوی کیا کہ وہ ایک تکلیف دہ زندگی گزار رہی ہے اور اس نے ان سے شادی کی خواہش ظاہر کی۔

پائلٹ کے مطابق خاتون نے انہیں ملتان بلایا جہاں ان کی 24 اپریل 2025 کو ملاقات ہوئی، تاہم اس ملاقات میں یہ انکشاف ہوا کہ اس خاتون کا اصل نام الف ہے اور وہ سوشل میڈیا پر جعلی اکانٹ چلا رہی تھی۔مدعی کے مطابق خاتون کے رویے نے اسے مشکوک کر دیا اور انہوں نے اس سے رابطہ منقطع کر دیا، انہوں نے الزام لگایا کہ اس کے انکار کے بعد الف نے انہیں بار بار فون کالز کیں اور دھمکیاں دیں کہ اگر انہوں نے شادی سے انکار کیا تو وہ اسے سنگین نتائج بھگتنے پر مجبور کرے گی۔پائلٹ نے دعوی کیا کہ خاتون نے انہیں ایک جھوٹے ریپ کیس میں پھنسانے کی دھمکی بھی دی۔انہوں نے مزید کہا کہ انہیں پتا چلا ہے کہ الف عادی بلیک میلر ہے اور اس نے پہلے بھی 2021 میں ویمن پولیس اسٹیشن ملتان میں دفعہ 376 کے تحت ایک جھوٹا زیادتی کا مقدمہ نمبر 30/21 درج کروا رکھا ہے۔انہوں نے پولیس سے درخواست کی کہ وہ خاتون کے خلاف کارروائی کرے اور انہیں بلیک میلنگ سے بچایا جائے۔

کریڈٹ: انڈیپنڈنٹ نیوز پاکستان-آئی این پی