پاکستان اور چین کے مابین سمعی و بصری اور نشریاتی شعبوں میں دو طرفہ تعاون کو وسعت دینے کیلئے معاہدے پر دستخط ہوگئے ، جس کا مقصد میڈیا کے میدان میں مہارتوں کا تبادلہ اور اشتراک کو بڑھانا ہے۔ اس موقع پر پاکستان کی نمائندگی وفاقی سیکرٹری اطلاعات و نشریات عنبرین جان نے کی جبکہ چین کی طرف سے نیشنل ریڈیو اینڈ ٹیلی ویژن ایڈمنسٹریشن (این آر ٹی اے) کے پارٹی گروپ کے رکن اور وائس منسٹر ڈونگ شن نے دستخط کئے ۔ جاری اعلامیہ کے مطابق یہ معاہدہ نہ صرف دونوں ممالک کے درمیان روایتی میڈیا تعلقات کو مزید مستحکم کرے گا بلکہ جدید نشریاتی تقاضوں سے ہم آہنگ سمعی و بصری میدان میں بھی تعاون کی نئی راہیں کھولے گا۔معاہدے کے تحت پاکستان اور چین کے میڈیا ادارے مشترکہ منصوبے شروع کر سکیں گے، ایک دوسرے کے تجربات سے سیکھ سکیں گے اور معلومات و مواد کا تبادلہ کیا جا سکے گا۔

فریقین نے اس بات پر اتفاق کیا ہے کہ نشریاتی شعبے میں تربیت، تکنیکی معاونت اور مشترکہ پروڈکشن کے امکانات کو فروغ دیا جائے گا تاکہ دونوں ممالک کے عوام ایک دوسرے کی ثقافت، روایات اور ترقیاتی پیش رفت سے واقف ہو سکیں۔اس اشتراک سے جہاں پیشہ ورانہ مہارت میں بہتری آئے گی، وہیں میڈیا کے ذریعے باہمی تعلقات کو بھی مزید مضبوط بنانے میں مدد ملے گی۔یہ معاہدہ اس بات کا عکاس ہے کہ پاکستان اور چین نہ صرف اقتصادی اور تجارتی شراکت داری کو فروغ دے رہے ہیں بلکہ میڈیا اور ثقافتی تبادلوں کو بھی تعلقات کے اہم ستون کے طور پر دیکھ رہے ہیں۔ یہ قدم دونوں ممالک کے درمیان سافٹ امیج اور عوامی سطح پر ہم آہنگی کو بڑھانے میں سنگِ میل ثابت ہو سکتا ہے۔

کریڈٹ: انڈیپنڈنٹ نیوز پاکستان-آئی این پی