ملک بھر میں شدید گرمی کی لہر جاری ہے، محکمہ موسمیات نے آئندہ تین سے چار روز تک گرمی کی شدت برقرار رہنے کی پیش گوئی کی ہے۔ اسلام آباد اور گردونواح میں شدید گرم اور خشک موسم متوقع ہے جبکہ بالائی علاقوں میں 17 سے 19 مئی تک درجہ حرارت معمول سے سات ڈگری زائد رہنے کا امکان ہے۔محکمہ موسمیات کے مطابق جنوبی علاقوں میں بھی 17 سے 20 مئی تک درجہ حرارت معمول سے چھ ڈگری تک زیادہ رہے گا، خاص طور پر خیبر پختونخوا کے جنوبی و وسطی اضلاع میں شدید گرمی کے ساتھ زیادہ تر علاقے خشک موسم کا سامنا کریں گے۔ پنجاب کے مختلف حصوں میں دن کے اوقات میں درجہ حرارت میں اضافہ کی توقع ہے۔سندھ کے بیشتر اضلاع میں درجہ حرارت 47 سے 48 ڈگری سینٹی گریڈ تک پہنچنے کا خدشہ ہے، جہاں موسم شدید گرم اور خشک رہے گا۔ بلوچستان کے جنوبی اضلاع میں بھی شدید گرمی کے ساتھ تیز ہوائوں کے چلنے کا امکان ہے۔ کشمیر اور گلگت بلتستان میں بھی گرم اور خشک موسم برقرار رہے گا، جہاں درجہ حرارت معمول سے زیادہ رہنے کی توقع ہے۔ محکمہ موسمیات نے شہریوں کو گرمی سے بچا ئوکے لیے ہدایات جاری کرتے ہوئے کہا ہے کہ وہ زیادہ سے زیادہ پانی پیئیں اور دھوپ میں کم سے کم وقت گزاریں تاکہ صحت کے مسائل سے بچا جا سکے۔

کریڈٹ: انڈیپنڈنٹ نیوز پاکستان-آئی این پی