پاکستان جمہوری لیگ کے سربراہ رانا زمان سعید نے کہا ہے کہ ملک میں عام انتخابات کے شیڈول کا اعلا ن تو خوش آئندہے لیکن انتخابات کو صاف اور شفاف بنانے کے لئے سخت اقدامات کی ضرورت ہے ، ماضی کے بیشتر انتخابات کو سیاسی جماعتوں نے تسلیم نہیں کیا اس لئے فروری 2024 کا الیکشن ایسا ہوناچاہیے جو سب کے لئے قابل قبول ہو،محض ایک سیاسی جماعت کو آگے لانے کا خفیہ منصوبہ جمہوریت اور سیاسی استحکام کے لئے نقصان دہ ہوگا، اتوار کو صحافیوں سے بات چیت کرتے ہوئے رانا زما ن سعید نے کہا کہ ملکی تاریخ میں جو بھی الیکشن ہوئے ہیں سیاسی جماعتوں کی طرف سے ان کو مکمل طور پر تسلیم نہیں کیا گیا جس کی وجہ سے ملک میں جمہوریت مضبوط نہیں ہو سکی ، اس بار بھی اگر الیکشن صاف اور شفاف نہ ہوئے تو ملک میں سیاسی استحکام نہیں آئے گا جس سے ملکی معیشت مزید زبوں حالی کا شکار ہوئے جائے گی اور اس کی قیمت غریب عوام کو مہنگائی کی صورت میں ادا کرنے پڑے گی ، انہوں نے کہا کہ الیکشن کمیشن سمیت تمام متعلقہ اداروں پر ذمہ داری عائد ہوتی ہے کہ وہ کسی ایک سیاسی جماعت کو پروموٹ کرنے کی بجائے عوام کو آزادانہ طور پر حق رائے دہی استعمال کرنے دیں اور عوام کے ووٹوں سے جو بھی منتخب ہوکر آئے حکومت کی باگ ڈور اسے سنبھالنے دی جائے ، انہوں نے کہا کہ دنیا کے امیر ملک اپنے مضبوط نظام کی وجہ سے ترقی کر رہے ہیں جبکہ ہم آگے بڑھنے کی بجائے ہر گزرتے دن تنزلی کا شکار ہیںجس کی تمام تر ذمہ داری چور دروازے کے ذریعے اقتدار میں آنے والے مفاد پرست سیاستدانوں اور اسٹیبلشمنٹ پر عائد ہوتی ہے اور ایسے لوگ ملک و قوم کے مجرم ہیں۔

کریڈٹ: انڈیپنڈنٹ نیوز پاکستان-آئی این پی