کراچی اور پشاور،لاہور سمیت ملک بھر میں چینی کی قیمت میں اضافے کا سلسلہ بدستور جاری ہے اور فی کلوقیمت 200 روپے کلو تک پہنچ گئی ۔دکانداروں کا کہنا ہے کہ پشاور کی ریٹیل مارکیٹ میں چینی 190 سے 200 روپے فی کلو تک فروخت ہو رہی ہے، ریٹیل مارکیٹ میں 2 ہفتے قبل چینی کی فی کلو قیمت 180 روپے تھی۔شوگر ڈیلرز کا کہنا ہے کہ ہول سیل مارکیٹ میں چینی کی فی کلو قیمت میں ایک روپے کا اضافہ ہوا ہے، ہول سیل مارکیٹ میں چینی کی فی کلو قیمت 179 روپے تک پہنچ گئی ہے، گزشتہ روز ہول سیل مارکیٹ میں چینی کی فی کلو قیمت 178 روپے تھی۔ادھر کوئٹہ شہر میں ریٹیل میں چینی کی 186 سے 190 روپے فی کلو میں فروخت ہو رہی ہے، ہول سیل میں چینی 183 روپے فی کلو میں فروخت کی جارہی ہے۔کراچی کی ہول سیل مارکیٹ میں چینی کی فی کلو قیمت 2 روپے بڑھی ہے جس کے بعد چینی کی ہول سیل قیمت 180 روپے فی کلو ہو گئی ہے جبکہ ریٹیل مارکیٹ میں چینی 185 سے 200 روپے فی کلو مل رہی ہے۔ ادھر لاہور میں بھی چینی کے نرخ عوام کی پہنچ سے باہر ہونے لگے، مختلف علاقوں میں چینی 190 سے 200 روپے فی کلو تک فروخت کی جا رہی ہے، جس سے شہری شدید پریشان ہیں۔

شہر کے بیشتر علاقوں میں چینی کی قیمتوں میں واضح فرق دیکھنے میں آ رہا ہے۔ کہیں چینی 190 روپے فی کلو تو کہیں 200 روپے فی کلو تک جا پہنچی ہے۔ صارفین کا کہنا ہے کہ حکومتی کنٹرول نہ ہونے کے باعث دکاندار من مانی قیمتوں پر چینی فروخت کر رہے ہیں۔شہریوں نے ضلعی انتظامیہ سے مطالبہ کیا ہے کہ فوری طور پر نرخ نامے جاری کیے جائیں اور پرائس کنٹرول کمیٹیاں متحرک کی جائیں تاکہ مصنوعی مہنگائی کو روکا جا سکے۔دوسری جانب ضلعی انتظامیہ کا کہنا ہے کہ گرانفروشی کے خلاف کارروائی کی جا رہی ہے اور قیمتوں کو کنٹرول میں لانے کے لیے اقدامات جاری ہیں، تاہم زمینی حقائق اس کے برعکس دکھائی دے رہے ہیں۔واضح رہے کہ حکومت نے چینی کی قیمتوں پر قابو پانے کے لیے 5 لاکھ ٹن چینی برآمد کرنے کا فیصلہ کیا ہے جس کے لیے باقاعدہ ٹینڈر بھی جاری کر دیا گیا ہے جبکہ سابق نگران وفاقی وزیر اور نواز شریف کے قریبی ساتھی فواد حسن فواد نے چینی درآمد کرنے کے حکومتی فیصلے کی مخالفت کرتے ہوئے اس پر نظرثانی کا مطالبہ کیا ہے۔

کریڈٹ: انڈیپنڈنٹ نیوز پاکستان-آئی این پی