پی ٹی آئی رہنما اعظم سواتی نے الزام عائد کیا ہے کہ ملک میں جو کچھ ہو رہا ہے اس کی شروعات جنرل باجوہ نے کی، بانی چیئرمین کے ملٹری ٹرائل کی باتیں ہو رہی ہیں، دیکھ لیں گے اس کے بعد ملک میں کیا ہو گا،نائب وزیر اعظم اسحاق ڈار کے خلاف رِٹ دائر کررہا ہوں،میں افغانستان جا رہا ہوں میرا پاسپورٹ بلاک کیا گیا ہے، اپنے حق کے لیے بطور عام شہری درخواست دائر کررہا ہوں۔۔پشاورہائی کورٹ میں میڈیا سے بات چیت کرتے ہوئے اعظم سواتی نے کہا بنارسی ٹھگ اسحاق ڈار کو پتہ بھی نہیں کہ میں اسے عدالت میں لا رہا ہوں۔ملک سے باہر جانے پر کوئی پابندی نہیں میں ذاتی طور پر جا رہا تھا۔ انہوں نے کہاکہ ملک میں جو ہو رہا ہے اس کی شروعات جنرل باجوہ نے کی۔ یہ کون لوگ ہیں جو ملک کے اندر فوج کے خلاف نفرت پیدا کر رہے ہیں۔ بانی پی ٹی آئی نے کہا تھا کہ فوج اور عوام کی عزت ایک دوسرے سے جڑی ہوئی ہے۔انہوں نے کہا کہ جس ملک میں لوگ پارلیمنٹ سے اٹھائے جائیں، ان کا کوئی مستقبل نہیں ہوتا۔ قومی مجرم نواز شریف اور دیگر کو ملک میں پناہ دی گئی ہے۔ خدارا اس ملک کو بچائو ، فوج کی عزت کو بحال کرو۔ چین سے دوستی پاکستان کے فائدے میں ہے۔پی ٹی آئی ملک کو جوڑنے کے لیے تیار ہے۔پی ٹی آئی رہنما کا کہنا تھا کہ ملک کی عدالتی تاریخ میں قاضی فائز عیسی کے فیصلے بدترین مثال ہے۔ تمام جماعتوں کو اکھٹا ہو کر عدالتی شب خون کو روکنا ہوگا۔ بنارسی ٹھگ اسحاق ڈار کو نائب وزیر اعظم بنایا گیا۔ اسحاق ڈار کے حدیبیہ ملز کیس میں بیانات سب کے سامنے ہیں۔ اسحاق ڈار کا کام ملک کو لوٹ کر باہر لے جانا ہے۔ انہوں نے کہا کہ افغانستان اور ایران سے بات کرکے معاملات درست کرنے کی ضرورت ہے۔ اسٹیبلشمنٹ سے بات کرنے گیا یہ غلط ہے۔ ترنول جلسہ خون ریزی کی وجہ سے ملتوی کیا۔ جلسے کے راستے فوج نے نہیں محسن نقوی نے کنٹینر لگا کر بند کیے تھے۔اعظم سواتی نے کہا کہ بانی چیئرمین کے ملٹری ٹرائل کی باتیں ہو رہی ہیں، دیکھ لیں گے اس کے بعد ملک میں کیا ہو گا۔

کریڈٹ: انڈیپنڈنٹ نیوز پاکستان-آئی این پی