گزشتہ ہفتے کے دوران ملک میں سیمنٹ کی ریٹیل قیمت میں معمولی کمی ریکارڈ کی گئی ہے۔ ادارہ شماریات پاکستان کے مطابق 11 ستمبر کو ختم ہونے والے ہفتے میں ملک کے شمالی شہروں میں سیمنٹ کی فی بوری کی اوسط ریٹیل قیمت 1390 روپے ریکارڈ کی گئی، جو اس سے گزشتہ ہفتے کے مقابلے میں 0.07 فیصد کم ہے۔ 4 ستمبر کو ختم ہونے والے ہفتے میں ان شہروں میں سیمنٹ کی فی بوری کی اوسط قیمت 1391 روپے رہی تھی۔ دوسری جانب ملک کے جنوبی شہروں میں سیمنٹ کی قیمت میں کوئی تبدیلی نہیں دیکھی گئی۔ 11 ستمبر کو ختم ہونے والے ہفتے میں جنوبی علاقوں میں سیمنٹ کی فی بوری کی اوسط ریٹیل قیمت 1443 روپے ریکارڈ کی گئی، جو پچھلے ہفتے میں بھی یہی رہی تھی۔ اعداد و شمار کے مطابق اسلام آباد میں سیمنٹ کی فی بوری کی اوسط قیمت 1367 روپے، راولپنڈی 1372، گوجرانوالہ 1420، سیالکوٹ 1410، لاہور 1443، فیصل آباد 1380، سرگودھا 1370، ملتان 1424، بہاولپور 1450، پشاور 1350 اور بنوں میں 1300 روپے ریکارڈ کی گئی۔ اسی طرح کراچی میں سیمنٹ کی فی بوری کی اوسط قیمت 1367 روپے، حیدر آباد 1427، سکھر 1465، لاڑکانہ 1407، کوئٹہ 1510 اور خضدار میں 1483 روپے ریکارڈ کی گئی۔

کریڈٹ: انڈیپنڈنٹ نیوز پاکستان-آئی این پی