وفاقی وزیراطلاعات و نشریات عطا اللہ تارڑ نے کہا ہے کہ ملکی معیشت درست سمت میں آ چکی ہے یہ ٹیم ورک کا نتیجہ ہے، وزیراعظم شہباز شریف کی کارکردگی کو پوری دنیا سراہتی ہے، اس میں فوج کے ادارے اور فیلڈ مارشل عاصم منیر کا بڑا کردار ہے ، پنجا ب میں عوام کی خدمت کے ریکارڈ بن رہے ہیں، کے پی کے میں اس کے مقابلے میں کچھ بھی نہیں ہے ، نوازشریف کی شخصیت کو نئی نسل کے ذہنوں میں سازش کے تحت منفی انداز میں پیش کیا گیا۔ان خیالات کااظہار انہوں نے لاہور میں منعقدہ ایک تقریب سے خطاب کرتے ہوئے کیا ۔انہوں نے کہا کہ میاں نوازشریف کی سیاست میں آنے سے پہلے اور بعد میں ان کی شخصیت اور حالات کو نئی نسل کے ذہنوں میں سازش کے تحت منفی انداز میں پیش کیا گیا، نئی نسل کے ذہنوں میں ایک زہر بھرا گیا اور ابہام پیدا کیے گئے اس نواز شریف کے بارے میں جو گورنمنٹ کالج مرسڈیز پر جایا کرتا تھا، ان کے والد نے 1960/70 کی دہائی میں ایشیا کی سب سے بڑی سٹیل فیکٹری قائم کی تھی۔

وفاقی وزیر کا کہنا ہے کہ اس وقت میاں شریف کے بچے پوری دنیا کے دورے کرتے تھے، ان کے بچوں کے عالمی دورے، بزنس ملاقاتیں اور صنعتی قیادت کے واضح ثبوت تصاویر کی صورت میں موجود ہیں، 1985 میں نواز شریف کے سیاست میں آنے سے پہلے میاں شریف نے نیشنلائزیشن کے دردناک عمل کے باوجود اپنی محنت اور کریڈیبلٹی سے نئی صنعتیں قائم کیں، روزگار کے مواقع پیدا کیے اور ملک کے لیے زر مبادلہ پیدا کیا، اس پہلو پر بات ہونی چاہیئے اور روشنی ڈالی جانی چاہیئے کیوں کہ بہت سارے لوگوں کو 1985 سے پہلے والی تاریخ بھول جاتی ہے۔عطا تارڑ نے کہاکہ آج جو معیشت درست سمت میں آ چکی ہے یہ ٹیم ورک کا نتیجہ ہے، وزیراعظم شہباز شریف کی کارکردگی کو پوری دنیا سراہتی ہے، اس میں فوج کے ادارے اور فیلڈ مارشل عاصم منیر کا بڑا کردار ہے اور پنجاب میں جو پبلک سروس ڈیلیوری ہے، مریم نواز جس طرح دن رات آپ کی خدمت کر رہی ہیں ریکارڈ بن رہے ہیں، کے پی کے میں اس کے مقابلے میں کچھ بھی نہیں ہے۔

کریڈٹ: انڈیپنڈنٹ نیوز پاکستان-آئی این پی