معروف عالم دین مولانا طارق جمیل کے بڑے بیٹے مولانا یوسف جمیل نے اپنے بھائی عاصم جمیل کی خودکشی کی تصدیق کرتے ہوئے کہا ہے کہ میرا بھائی عاصم جمیل بچپن سے شدید ڈپریشن کا مریض تھا،بیماری کو کنٹرول کرنے کے لیے عاصم کو الیکٹرک شاک لگائے جارہے تھے،عاصم نے سکیورٹی سے بندوق لے کر خود کو گولی مارلی ۔ مرحوم کے بڑے بھائی نے ویڈیو پیغام میں عاصم جمیل کی خودکشی کی تصدیق کردی اور کہا کہ میرا بھائی عاصم جمیل بچپن سے شدید ڈپریشن کا مریض تھا۔ مولانا یوسف جمیل نے کہا عاصم جمیل کی بیماری میں پچھلے 6 ماہ سے شدت آگئی تھی، بیماری کو کنٹرول کرنے کے لیے عاصم کو الیکٹرک شاک لگائے جارہے تھے لیکن الیکٹرک شاک دینے سے بھی کوئی افاقہ نہیں ہوا۔ انہوں نے کہا گزشتہ روز وہ اتفاقا گھر میں اکیلا تھا، تکلیف اور اذیت برداشت نہیں کرسکا اور عاصم نے سکیورٹی سے بندوق لے کر خود کو گولی مارلی۔ بھائی نے اپنے پیغام میں یہ بھی کہا کہ ایسی کوئی بات نہیں کہ کسی سے دشمنی تھی یا کسی نے حملہ کیا،یہ اس کی تقدیر تھی اور ہم اللہ کے اس فیصلے پر راضی ہیں۔

کریڈٹ: انڈیپنڈنٹ نیوز پاکستان-آئی این پی