اینٹی نارکوٹکس فورس(اے این ایف) نے مختلف شہروں میں منشیات اسمگلنگ کے خلاف6 کارروائیوں کے دوران خاتون اور افغان شہری سمیت 7 ملزمان کو گرفتار کر لیا۔ترجمان اے این ایف ہیڈکوارٹر نے بتایا کہ 6 کارروائیوں میں 41 لاکھ روپے سے زائد مالیت کی 49.283 کلوگرام منشیات برآمد کی گئی۔اسلام آباد ایئرپورٹ پر مسقط (عمان) جانے والے ملزم کے پیٹ سے 683 گرام وزنی 90 آئس بھرے کیپسولز برآمد کیے گئے جبکہ ہوائی اڈے پر ایک اور کارروائی کے دوران برطانیہ جانے والے مسافر کے سامان سے 8.5 کلوگرام وزنی 29400 ڈیازیپام گولیاں برآمد کی گئیں۔اے این ایف کے مطابق رنگ روڈ پشاور کے قریب گاڑی سے 500 گرام آئس برآمد کر کے افغان شہری کو گرفتار کیا گیا جبکہ بحریہ ٹان لاہور کے قریب کار اور موٹرسائیکل سوار سے 30 کلوگرام چرس برآمد کر کے 2 ملزمان کو حراست میں لیا گیا۔اسی طرح اقبال شہید ٹول پلازہ اٹک کے قریب ٹرک سے 7.2 کلوگرام چرس برآمد کر کے ملزم کو گرفتار کیا گیا، موٹروے ٹول پلازہ پشاور کے قریب خاتون ملزمہ کے قبضے سے 2.4 کلوگرام چرس برآمد کی گئی۔ترجمان کے مطابق کارروائیوں کا انسداد منشیات ایکٹ 1997 کے تحت مقدمات درج کر کے تحقیقات کا آغاز کر دیا گیا ہے۔

کریڈٹ: انڈیپنڈنٹ نیوز پاکستان-آئی این پی