نیشنل ڈیٹا بیس اینڈ رجسٹریشن اتھارٹی (نادرا)نے وفات پانے والے شخص کا قومی شناختی کارڈ گھربیٹھے منسوخ کروانے کی سہولت فراہم کردی ۔نادرا کے بیان کے مطابق کسی فوت شدہ شخص کا شناختی کارڈ اس کے قریبی خونی رشتہ دار جس میں بیٹا، بیٹی، شریکِ حیات، والدین، بہن یا بھائی شامل ہوں پاک آئی ڈی ایپ کے ذریعے بلا معاوضہ منسوخ کروا سکتے ہیں۔ یہ عمل کسی بھی نادرا رجسٹریشن سینٹر میں جا کر بھی مکمل کیا جا سکتا ہے،نادرا وفات پانے والے شخص کا شناختی کارڈ باضابطہ منسوخ کرتا ہے تو ساتھ میں کینسلیشن سرٹیفکیٹ بھی جاری کرتا ہے۔قانون کے مطابق خاندان کے فرد کی ذمہ داری ہے کہ وہ وفات پانے والے شخص کا 60 دن کے اندر شناختی کارڈ منسوخ کروائیں۔

وفات پانے والے شخص کاشناختی کارڈمنسوخ کروانے کیلئے یونین کونسل، میونسپل کمیٹی، کنٹونمنٹ بورڈ کی جانب سے جاری کردہ تصدیق شدہ کمپیوٹرائزڈ ڈیتھ سرٹیفکیٹ یا بیرونِ ملک جاری شدہ ڈیتھ سرٹیفکیٹ اگر قابلِ اطلاق ہو ضروری ہے۔شہری نادرا کی پاک آئی ڈی ایپ کے ذریعے کینسلیشن سرٹیفکیٹ کیلئے درخواست دے سکتے ہیں،مرحوم/مرحومہ کے شناختی کارڈ کی منسوخی کی درخواست اس کی بیٹیوں یا بہن بھائیوں کے پاک آئی ڈی اکاونٹ کے ذریعے جمع کروائی جا سکتی ہے۔ والدین، بہن بھائی، شریکِ حیات یا اولاد سمیت کوئی بھی خونی رشتہ دار اپنے پاک آئی ڈی اکائو نٹ کے ذریعے فوتگی کی بنیاد پر شناختی کارڈ منسوخ کروانے کی درخواست دے سکتا ہے۔

کریڈٹ: انڈیپنڈنٹ نیوز پاکستان-آئی این پی