چیئرمین آل پاکستان ٹیکسٹائل پراسیسنگ ملز ایسوسی ایشن (اپپٹما)حافظ شیخ محمد اصغر قادری نے نگران وفاقی حکومت کے ملکی ریونیو کو 100 ارب ڈالر تک لے جانے کے عزم کو سراہتے ہوئے کہا کہ یہ پہلا موقع ہے کہ حکومت کی جانب سے سٹیک ہولڈرز کو بھی کسی مشاورتی کونسل میں شامل کیا گیا۔ انہوں نے وفاقی وزیر صنعت و تجارت کی کاوشوں کو خراج تحسین پیش کرتے ہوئے کہا کہ پاکستان کے صنعتکار اور کاروباری حضرات کی طرف سے انہیں ہر ممکن تعاون فراہم کیا جائے گا اور حکومت کو تجاویز پیش کرنے کیلئے اپپٹما اپنا بھرپورومثبت کردار ادا کرے گی۔انہوں نے کہا کہ بزنس کمیونٹی کا ہمیشہ سے یہ دیرینہ مطالبہ تھا کہ مشاورت سے پالیسی مرتب کی جائے لہٰذا موجودہ وفاقی حکومت نے پہلی مرتبہ بزنس کمیونٹی کومتعلقہ مشاورتی کمیٹیوں میں شامل کرکے یہ پیغام دیا کہ وہ پاکستان کی معیشت کو درست سمت پر گامزن کرنے کیلئے سنجیدہ ہے۔انہوں نے کہا کہ نگران وفاقی حکومت کے اس اقدام سے پاکستان کی معیشت اپنے پیروں پر کھڑی ہو گی اور ملک میں جاری بحران کا جلد خاتمہ ہو گا۔

کریڈٹ: انڈیپنڈنٹ نیوز پاکستان-آئی این پی