قومی احتساب بیورو (نیب ) نے اہم کارروائی کرتے ہوئے کوہستان میں ملکی تاریخ کے سب سے بڑے 40 ارب روپے کے کرپشن کیس میں ملوث ملزمان کے گھروں پر چھاپوں کے دوران 12 ملزمان کو گرفتار کرلیا اور ایک ارب انسٹھ کروڑ روپے کی خطیر رقم برآمد کرلی گئی ہے، جس میں پاکستانی کرنسی، امریکی ڈالر اور سونا شامل ہے۔ذرائع کے حوالے سے میڈیا رپورٹ کے مطابق کارروائی گرفتار کلرک کے انکشافات پر عمل میں لائی گئی، جس نے دورانِ تفتیش اہم راز فاش کیے۔ یہ کرپشن مبینہ طور پر سی اینڈ ڈبلیو(کمیونیکیشن اینڈ ورکس) کے تعمیراتی منصوبوں میں کی گئی۔ ہری پور میں واقع ایک گولڈ لیب کے مالک عمران کو بھی حراست میں لے لیا گیا ہے، جہاں سے ساڑھے تین کروڑ روپے مالیت کا سونا برآمد کیا گیا۔ مزید تحقیقات کے دوران تین دیگر افراد کے گھروں سے بھی تین کلوگرام سونا برآمد ہوا ہے۔ نیب حکام کا کہنا ہے کہ ابتدائی طور پر بارہ ملزمان کی شناخت ہوچکی ہے تاہم ان کے نام فی الحال خفیہ رکھے جا رہے ہیں۔ اب تک پچاس سے زائد افراد سے تفتیش کی جا چکی ہے اور تحقیقات کا دائرہ کار مزید وسیع کیا جا رہا ہے۔

کریڈٹ: انڈیپنڈنٹ نیوز پاکستان-آئی این پی