نیشنل ڈیفنس یونیورسٹی کے زیرِ اہتمام جاری 27 ویں نیشنل سکیورٹی ورکشاپ کے شرکا نے گوادر کا تفصیلی دورہ کیا جہاں انہیں سی پیک کی اسٹریٹجک اہمیت، گوادر پورٹ کے محفوظ آپریشن اور ساحلی پٹی کے سکیورٹی نظام پر جامع بریفنگ دی گئی۔دورے کے دوران جنرل آفیسر کمانڈنگ (جی او سی ) گوادر نے خطے کی مجموعی سکیورٹی صورتحال، اہم تنصیبات کے تحفظ اور ساحلی علاقوں میں جاری اقدامات کے بارے میں تفصیلی آگاہی فراہم کی۔شرکا کو بتایا گیا کہ سکیورٹی فورسز دہشت گردی کی روک تھام، منشیات اور اشیا کی سمگلنگ کے سدباب اور ساحلی نگرانی کے لیے مربوط آپریشنز کر رہی ہیں۔شرکا نے چائنہ بزنس سینٹر گوادر کا بھی دورہ کیا جہاں انہیں گوادر پورٹ کے جاری اور مستقبل کے ترقیاتی منصوبوں، سرمایہ کاری کے مواقع اور تجارتی سرگرمیوں کے حوالے سے بریفنگ دی گئی۔

اس موقع پر جی او سی گوادر نے گفتگو کرتے ہوئے کہا ہے کہ امن و استحکام کے ساتھ ساتھ سرمایہ کاری، تجارت اور مقامی ترقیاتی منصوبوں کے تحفظ کو اولین ترجیح حاصل ہے۔ورکشاپ کے شرکا نے مکران ڈویژن میں امن و امان کے قیام، سرمایہ کاری کیلئے سازگار ماحول اور تیز رفتار ترقیاتی منصوبوں کی تکمیل میں پاک فوج کے کردار کو بھرپور خراج تحسین پیش کیا۔شرکا نے کہا ہے کہ علاقے میں مثبت تبدیلی، بہترین سکیورٹی مینجمنٹ اور وسیع سرمایہ کاری کے امکانات انتہائی حوصلہ افزا ہیں، شرکا نے دورے کے اختتام پر پاکستان پوائنٹ گوادر اور پاکستان نیول شپ کا بھی دورہ کیا جہاں انہیں میری ٹائم سکیورٹی اور نیول آپریشنز سے متعلق آگاہی فراہم کی گئی۔

کریڈٹ: انڈیپنڈنٹ نیوز پاکستان-آئی این پی