دفتر خارجہ نے ژوب حملے میں افغان شہریوں کے ملوث ہونے کی تصدیق کردی۔ ترجمان ممتاز زہرہ بلوچ کہتی ہیں افغانستان اپنی سرزمین پاکستان کیخلاف استعمال ہونے سے روکے، پاکستان بھارت کی طرح کھیلوں کو سیاست کی نذر نہیں کرنا چاہتا، ورلڈ کپ کیلئے کرکٹ ٹیم بھارت بھیجنے کا فیصلہ پاکستان کی مثبت سوچ کا عکاس ہے۔ ژوب حملے میں مارے گئے دہشتگرد افغانستان کے شہری نکلے۔ دفتر خارجہ نے پاکستان کی شدید تشویش اور تحفظات سے افغان حکام کو آگاہ کردیا۔ ترجمان دفتر خارجہ ممتاز زہرہ بلوچ نے ہفتہ وار بریفنگ میں بتایا کہ حملے کی تحقیقات کیلئے افغان حکام سے رابطے میں ہیں، افغانستان کو دہشتگردی سے نمٹنے کیلئے اپنی استعداد بڑھانے میں تعاون کی پیشکش بھی کردی۔ پاکستان نے ورلڈ کپ میں شرکت کیلئے اپنی ٹیم بھارت بھیجنے کا فیصلہ کیوں کیا؟، ترجمان دفتر خارجہ نے وجہ بتاتے ہوئے پاکستان اور بھارت کی سوچ کا فرق بھی واضح کردیا۔ ممتاز زہرہ بلوچ نے کہا کہ فیصلہ پاکستان کے اس مقف کا عکاس ہے کہ کھیلوں کو سیاست سے علیحدہ رکھنا چاہئے، پاکستان کی مثبت اور تعمیری سوچ بھارت سے بالکل مختلف ہے، جس نے کھیلوں پر سیاست کرتے ہوئے ایشیا کپ میں شرکت کیلئے اپنی ٹیم پاکستان بھیجنے اور پاکستان کی بلائنڈ کرکٹ ٹیم کو ویزے دینے سے انکار کیا تھا۔ ترجمان کا کہنا تھا کہ وزیر خارجہ بلاول بھٹو نے قرآن کی بے حرمتی کے حالیہ واقعات کی شدید مذمت کرتے ہوئے مطالبہ کیا ہے کہ اسلاموفوبیا کے خاتمے کیلئے اقوام متحدہ کا نمائندہ خاص مقرر کیا جائے۔

کریڈٹ: انڈیپنڈنٹ نیوز پاکستان-آئی این پی