وفاقی وزیرداخلہ محسن نقوی تربت میں فرنٹیئر کور ساتھ کے ہیڈ کوارٹر پہنچے اور شہید جوانوں کی نماز جنازہ میں شرکت کی۔وزیرداخلہ محسن نقوی اور آئی جی ایف سی ساتھ میجر جنرل بلال سرفراز خان نے ضلع کیچ میں شہید کیپٹن وقار احمد اور 4 جوانوں کی نماز جنازہ میں شرکت کی، نماز جنازہ میں اعلی عسکری و سول حکام بھی شریک ہوئے، انہوں نے جام شہادت نوش کرنے والے کیپٹن وقار، نائیک عصمت اللہ، لانس نائیک جنید احمد و خان محمد اور سپاہی محمد ظہور کو خراج عقیدت پیش کیا۔محسن نقوی اور آئی جی ایف سی ساتھ میجر جنرل بلال سرفراز نے شہدا کے بلندی درجات کیلئے دعا کی اور شہدا کے جسد خاکی کو کندھا دیا۔وفاقی وزیر محسن نقوی کا کہنا تھا کہ کیپٹن وقار احمد اور جوانوں نے فرض کی راہ میں قیمتی جانیں نچھاور کر کے اعلی مثال قائم کی، قوم شہدا کی لازوال قربانیوں کا قرض نہیں اتار سکتی، شہدا کی عظیم قربانیاں رائیگاں نہیں جائیں گی، شہدا اور ان کے عظیم خاندانوں کو سلام پیش کرتے ہیں۔انہوں نے کہا کہ شہدا کے خاندان ہمارے اپنے خاندان ہیں، قوم ہمیشہ ان کی مقروض رہے گی۔اس موقع پر آئی جی ایف سی ساتھ میجر جنرل بلال سرفراز خان کا کہنا تھا کہ سکیورٹی فورسز کی قربانیاں دہشت گردی کے خلاف ہمارے غیر متزلزل عزم کا ثبوت ہیں۔

کریڈٹ: انڈیپنڈنٹ نیوز پاکستان-آئی این پی