پاک فوج نے لائن آف کنٹرول(ایل او سی) پر بھارتی جارحیت کا منہ توڑ جواب دیتے ہوئے بھارت کی متعدد چیک پوسٹیں تباہ کر دیں جبکہ بھارتی کواڈ کاپٹر بھی مار گرایا گیا، بوکھلاہٹ کا شکار بھارتی فوج نے سویلین آبادی پر گولہ باری شروع کردی جس کے نتیجے میں کم از کم5افراد شہید اور متعدد زخمی ہوگئے ۔سکیورٹی ذرائع کے مطابق جمعرات اور جمعہ کی درمیانی شب کیلر سیکٹر میں ڈوبہ مور پوسٹ، بٹالین ہیڈ کوارٹر سوجی اور پیر کانتھی سیکٹر میں جبار اینڈ ترکھیاں کمپلیکس مکمل تباہ کر دیا گیا جبکہ ان پوسٹوں کی تباہی سے بھارتی فوج کو بھاری نقصان اٹھانا پڑا۔سکیورٹی ذرائع نے مزید بتایا ہے کہ اس سے قبل بھی پاکستان کی موثر جوابی کارروائیوں سے کئی بھارتی چیک پوسٹ تباہ ہوچکی ہیں۔علاوہ ازیں ایل او سی کے قریبی علاقوں میں بھارت کیجانب سے کی گئی شیلنگ میں 4 افراد زخمی ہوئے ہیں، پاک فوج نے منہ توڑ جواب دیتے ہوئے جھنڈا زیارت پوسٹ تباہ کردی۔راولاکوٹ میں ہجیرہ میں بھارتی شیلنگ کے نتیجے میں 3 افراد زخمی ہو گئے جبکہ پلیارنی کالونی میں بھی بھارتی فوج کی گولہ باری سے ایک شخص زخمی ہوا۔حاجی پیر سیکٹر میں پاکستان نے بھارتی فوج کیخلاف موثر جوابی کارروائی کی، پاک فوج نے بھارتی فوج کی جھنڈا زیارت پوسٹ کو تباہ کردیا، جھنڈا زیارت پوسٹ کی تباہی سے دشمن کو بھاری نقصان اٹھانا پڑا ہے۔

پانڈو سیکٹر میں بھی پاکستان نے بھارتی فوج کیخلاف موثرجوابی کارروائی کی، پاک فوج نے بلااشتعال فائرنگ کرنے پر بھارتی فوج کا ہیڈکوارٹر تباہ کردیا۔سکیورٹی ذرائع کے مطابق باغسر میں پاک فوج نے بھارتی کواڈ کاپٹر مار گرایا، کواڈ کاپٹر کو صبح 3:15 پر نشانہ بنایا گیا ۔پاک فوج کی جانب سے دیگر مقامات پر بھی بھارتی فووجی چوکیوں کو نشانہ بنانے کی اطلاعات ہیں۔ دریں اثناء آزاد کشمیر میں کھوئی رٹہ سیکٹر کے گائوں گوڑہ میں بھارتی فوج نے آبادی پر وحشیانہ گولہ باری کی، جس کے نتیجے میں نومولود بچی سمیت 4 افراد شہید اور 12 زخمی ہوگئے۔ ایس پی کوٹلی عدیل احمد نے بتایا کہ شہید اور زخمی افراد کا تعلق ایل او سی کھوئیرٹہ سیکڑ سے ہے۔ عدیل احمد نے بتایا کہ زخمیوں کو ڈی ایچ کیو اسپتال منتقل کر دیا گیا ہے۔ بھارتی گولہ باری سے سمرہ آصف زوجہ آصف خورشید اپنی چالیس دن کی بچی سمیت اور راجہ شہپال بلیال میں شہید ہوئے جبکہ زخمی ہونے والوں میں امتیاز بیگم زوجہ خورشید گورسی،افرا خورشید ،طاہرہ خورشید،زبینہ زوجہ صیعب خورشید اور2 معصوم بچے شامل ہیں۔

ادھر باغ میں بھی بھارتی فوج نے آبادی پر وحشیانہ گولہ باری کی ، گائو ں کوٹیڑی نجم خان میں بھارتی گولہ باری سے 22 سالہ نوجوان اسامہ عشرت شہید ہو گیا جبکہ اسکی دو بہنیں شدید زخمی ہو گئیں ۔پولیس حکام کے مطابق دونوں زخمی بہنوں کو ڈسٹرکٹ اسپتال باغ منتقل کر دیا گیا ہے۔ سب ڈویژن ہجیرہ میں ایل او سی اور ہجیرہ شہر پر بھارتی گولہ باری سے چار افراد زخمی ہوئے۔ جن میںمعاویہ نواز ،عمر 21 سال گائوں دیوی گلی،ریحان شکور ،عمر 14 سال،گائوں ھود پھگواٹی،امیر اکبر، عمر 60 سال گائو ں منڈھول اور چوہدری محمد رفیق ، عمر 55 سال، گائو ں کھرنی رکڑ شامل ہیں ۔ تمام زخمی افراد کو ہجیرہ ٹی ایچ کیو میں طبی امداد د ی گئی ۔ریحان شکور کے علاہ دیگر مزید علاج کے لیے سی ایم ایچ منتقل کر دیا گیا ۔

کریڈٹ: انڈیپنڈنٹ نیوز پاکستان-آئی این پی