پاکستان سے چین کو کرومیم دھات کی برآمدات 32 فیصد اضافہ کیساتھ 117.68 ملین ڈالر تک پہنچ گئیں، 2023 میں چین کی کل 5.033 بلین ڈالر کی خام کرومیم کی درآمدات میں پاکستان کا حصہ 117.68 ملین ڈالر سے زیادہ تھا۔ چائنہ اکنامک نیٹ کے مطابق حالیہ برسوں میں پاکستان سے چین کو کرومیم دھات اور مرکب کی برآمدات میں اضافہ دیکھا گیا ہے۔ وزارت تجارت پاکستان کے ذرائع کے مطابق 2023 میں برآمدات میں 32 فیصد اضافہ ہوا اور یہ 117.68 ملین ڈالر تک پہنچ گئیں جو گزشتہ سال 89.28 ملین ڈالر تھیں۔ اقتصادی امور کے ماہر اکرام الحق سلہری نے سی ای این کو بتایا کہ پاکستانی حکومت چین کو کرومیم دھات کی برآمدات کو فروغ دینے کی خواہاں ہے۔ انہوں نے مزید کہا کہ پاکستان کی جانب سے چین کو کرومیم خام لوہے کی برآمدات میں حالیہ دنوں میں اضافہ ہوا ہے جس کی وجہ اچھے معیار اور مسابقتی قیمتیں ہیں۔ حالیہ برسوں میں چین میں اس کی بہت زیادہ مانگ رہی ہے۔ چائنہ اکنامک نیٹ کے مطابق انہوں نے کہا کہ پاکستان نے اپنی کرومیم دھات کی برآمدات کے معیار اور مستقل مزاجی کو یقینی بنانے کے لئے فعال اقدامات اٹھائے ہیں۔ کوالٹی کنٹرول کے سخت معیارات، بین الاقوامی قواعد و ضوابط کی پاسداری اور سرٹیفکیشن کے عمل نے پاکستانی کرومیم اور کی مارکیٹ ساکھ میں اضافہ کیا ہے، جس سے یہ چینی مینوفیکچررز کے لئے ترجیحی انتخاب بن گیا ہے۔ چائنہ اکنامک نیٹ کے مطابق 2023 میں چین کی کل کرومیم دھات کی درآمد 5.033 بلین ڈالر تھی جبکہ کل درآمدات میں پاکستان کا حصہ 117.68 ملین ڈالر سے زیادہ تھا۔

اس کی وجہ مقامی پاکستانی کمپنیوں کے تعاون سے چینی کمپنیوں کی بڑھتی ہوئی سرمایہ کاری اور کووڈ 19 کے بعد چین میں کرومیم دھات کی مصنوعات کی بڑھتی ہوئی طلب ہے۔ توقع ہے کہ یہ رجحان برقرار رہے گا کیونکہ دونوں ممالک کو بڑھتے ہوئے اقتصادی تعاون سے فائدہ ہوگا۔ چائنہ اکنامک نیٹ کے مطابق انہوں نے کہا کہ پاکستان غیر ملکی سرمایہ کاری خاص طور پر بڑی چینی کمپنیوں سے حاصل کرنا چاہتا ہے تاکہ عالمی مارکیٹ کے لئے قدر میں اضافہ اور مزید قیمتی مصنوعات تیار کی جا سکیں۔ چینی کمپنیوں کی پاکستان میں سرمایہ کاری سے نہ صرف ملکی معیشت کو فروغ ملے گا بلکہ جدید ٹیکنالوجیز اور مہارت کے دروازے بھی کھلیں گے۔ اس سے پاکستان کو اپنی مینوفیکچرنگ صلاحیتوں کو بڑھانے اور اعلی معیار کی ویلیو ایڈڈ مصنوعات تیار کرنے میں مدد ملے گی جو بین الاقوامی معیار پر پورا اتر سکتی ہیں۔ چائنہ اکنامک نیٹ کے مطابق پاکستان اپنے معدنی وسائل سے مزید فائدہ اٹھانے اور اپنے اسٹریٹجک جغرافیائی محل وقوع سے فائدہ اٹھانے کی صلاحیت رکھتا ہے تاکہ عالمی معدنیات کی منڈی میں ایک کلیدی کھلاڑی کے طور پر ابھر سکے۔ انہوں نے کہا کہ انفراسٹرکچر، ٹیکنالوجی اور انسانی سرمائے میں سرمایہ کاری جاری رکھ کر پاکستان اپنی برآمدات کی رفتار کو برقرار رکھ سکتا ہے اور آنے والے برسوں میں معاشی خوشحالی کی نئی راہیں کھول سکتا ہے۔

کریڈٹ: انڈیپنڈنٹ نیوز پاکستان-آئی این پی