وفاقی وزیر برائے خزانہ و محصولات سینیٹر محمد اورنگزیب نے کہا ہے کہپاکستان کی معیشت استحکام کے راستے پر گامزن ہے اور ریٹنگ میں بہتری کی امید ہے، وزیر اعظم ذاتی طور پر اصلاحات کے عمل کی نگرانی کر رہے ہیں ، حکومت کی کوشش ہے زیادہ سے زیادہ طبقات کو ٹیکس نیٹ میں لایا جائے اور لیکجز بند کی جائیں، رواں سال دو ٹریلین روپے کی آمدن میں اضافہ حکومت کی خودمختار کوششوں کا نتیجہ ہے، آئندہ دو برس میں ٹیکس ٹو جی ڈی پی شرح 13 سے 13.5 فیصد تک لے جانے کا ہدف ہے۔تفصیل کے مطابق وزیر خزانہ نے موڈیز ریٹنگ ایجنسی کے ساتھ ایک اہم ورچوئل اجلاس میں پاکستان کی معاشی صورتحال، اصلاحاتی ایجنڈے اور استحکام کی جانب پیش رفت پر تفصیلی بریفنگ دی۔ بریفنگ میں وزیر مملکت برائے خزانہ بلال اظہر کیانی، گورنر اسٹیٹ بینک اور وزارتِ خزانہ، ریونیو ڈویژن اور دیگر متعلقہ اداروں کے اعلی افسران بھی موجود تھے۔وزیر خزانہ نے موڈیز ٹیم کو ملکی معیشت کو مستحکم کرنے اور پائیدار و جامع ترقی کی بنیاد رکھنے کے لیے اہم کامیابیوں کی تفصیلات سے آگاہ کیا انہوں نے ٹیم کو آئی ایم ایف پروگرام کے تحت گذشتہ ریویو کا کامیاب اختتام اور اس کے نتیجے میں دوسری قسط کی فراہمی اور ریزیلینس اینڈ سسٹین ایبلیٹی فیسلٹی (RSF) میں پیش رفت سے آگاہ گیا۔وزیر خزانہ نے بجٹ میں کیے گئے مالیاتی اقدامات، تجارتی و ٹیرف اصلاحات، برآمدات پر مبنی ترقی کے لیے اقدامات اور کفایت شعاری کے فیصلوں پر روشنی ڈالی اور امریکا کے ساتھ ترجیحی ٹیرف تک رسائی سے متعلق بات چیت کو بھی مثبت پیش رفت قرار دیا ۔وزیر خزانہ نے حالیہ دنوں پاکستان کی جانب سے عالمی مالیاتی منڈیوں سے دوبارہ جڑنے اور بالخصوص مشرقِ وسطی مارکیٹ سے ایک ارب ڈالر کا کمرشل فنانسنگ معاہدہ کیے جانے، پانڈا بانڈ کے اجرا اور ریٹنگز میں مزید بہتری کے ساتھ یوروبانڈ سمیت دیگر بین الاقوامی منڈیوں میں پاکستان کی شمولیت اور رسائی کے ارادوں سے آگاہ کیا۔

وزیر خزانہ اور ان کی ٹیم نے معیشت میں بہتری کی ٹھوس علامات بالخصوص مہنگائی میں نمایاں کمی، پالیسی ریٹ میں کمی، روپے کی قدر میں استحکام، کرنٹ اکائونٹ میں سرپلس، ترسیلات زر میں اضافہ اور زرمبادلہ کے ذخائر کا جون کے آخر تک 14 ارب ڈالر سے تجاوز کیے جانے کا بھی ذکر کیاوزیر خزانہ نے موڈیز ٹیم کو ٹیکس ٹو جی ڈی پی ریشو میں بہتری کے لیے ٹیکنالوجی پر مبنی اصلاحات، نظام کی ڈیجیٹلائزیشن اور سخت نگرانی کے اقدامات سے بھی آگاہ کیا گیا۔ وزیر خزانہ نے بتایا کہ وزیر اعظم ذاتی طور پر ان اصلاحات کی نگرانی کر رہے ہیں اور حکومت کی کوشش ہے کہ زیادہ سے زیادہ طبقات کو ٹیکس نیٹ میں لایا جائے اور لیکجز بند کی جائیں۔ انہوں نے کہا کہ رواں سال دو ٹریلین روپے کی آمدن میں اضافہ حکومت کی خودمختار کوششوں کا نتیجہ ہے اور آئندہ دو برس میں ٹیکس ٹو جی ڈی پی شرح 13 سے 13.5 فیصد تک لے جانے کا ہدف ہے۔وزیر خزانہ اور ان کی ٹیم نے موڈیز کے سوالات کے تفصیلی جوابات بھی دئیے اور یقین دلایا کہ پاکستان اپنی معاشی اصلاحات، نجکاری، سرکاری اداروں کی تنظیم نو اور حکومتی ڈھانچے میں بہتری کے ایجنڈے پر پوری سنجیدگی سے عمل پیرا ہے۔انہوں نے امید ظاہر کی کہ معاشی اشاریوں میں بہتری اور حکومتی اقدامات کی بنیاد پر ریٹنگ ایجنسیز اس مثبت پیش رفت کو تسلیم کریں گی، جس سے ملک کو عالمی مالیاتی منڈیوں تک مزید رسائی حاصل ہوگی اور بیرونی شعبہ مزید مستحکم ہوگا۔وزیر خزانہ نے پاکستان کی جانب سے پائیدار ترقی، اصلاحات اور عالمی اعتماد کی بحالی کی راہ پر ثابت قدم رہنے کا عزم ظاہر کیا۔

کریڈٹ: انڈیپنڈنٹ نیوز پاکستان-آئی این پی