پاکستان پیپلز پارٹی نے سوات واقعہ کی شفاف تحقیقات او ر وزیر اعلی علی امین گنڈاپور کیخلاف مقدمہ درج کرنے کا مطالبہ کر دیا۔ یہ بات گورنر پنجاب سردار سلیم حیدر اور گورنر کے پی فیصل کریم کنڈی نے ڈسکہ میں گفتگو کرتے ہوئے کہی ۔دونو ں صوبوں کے گورنرز ڈسکہ پہنچے اور سانحہ سوات میں جاں بحق افراد کے لواحقین سے ملاقات کی اور اظہار تعزیت کیا۔گورنر پنجاب نے کہا کہ وزیراعلی خیبر پختونخوا علی امین گنڈا پور کا سوات سانحہ پر بیان افسوسناک ہے، کے پی حکومت کی نالائقی کی وجہ سے انسانی جانیں ضائع ہوئیں، خیبر پختونخوا حکومت کی کارکردگی انتہائی مایوس کن ہے، بروقت امدادی کارروائیوں سے انسانی جانوں کو بچایا جاسکتا تھا۔گورنر کے پی نے علی امین گنڈاپور کیخلاف سوات واقعہ کا مقدمہ درج کرنے کا مطالبہ کردیا۔دوسری جانب سلمان اکرم راجہ بھی پی ٹی آئی وفد کے ہمراہ ڈسکہ پہنچ گئے، لواحقین سے سانحہ سوات پر گہرے دکھ اور ہمدردی کا اظہار کیا، سلمان اکرم راجہ نے کہا کہ سوات سانحہ پر سیاست نہیں ہونی چاہئے، لواحقین کو 20 لاکھ روپے فی کس معاوضہ دیا جائے گا۔

کریڈٹ: انڈیپنڈنٹ نیوز پاکستان-آئی این پی