پاکستان کو تنظیم برائے انسدادِ کیمیائی ہتھیار(او پی سی ڈبلیو) کی ایگزیکٹو کونسل کیلئے 2026 تا 2028 دوبارہ منتخب کر لیا گیا ۔دفتر خارجہ سے جاری بیان کے مطابق یہ انتخاب 24 تا 28 نومبر کو دی ہیگ میں منعقدہ کانفرنس کے 30ویں اجلاس کے دوران ہوا۔واضح رہے کہ 193 رکن ممالک کا حامل کیمیکل ویپن کنونشن (سی ڈبلیو سی ) دنیا کا سب سے کامیاب تخفیفِ اسلحہ معاہدہ ہے جس کے تحت کیمیائی ہتھیاروں کی پوری کلاس کا خاتمہ کیا جا چکا ہے۔ او پی سی ڈبلیو کی ایگزیکٹو کونسل اس تنظیم کا اہم پالیسی ساز ادارہ ہے، جو کنونشن پر موثر عملدرآمد اور اس کی پاسداری کی نگرانی کرتی ہے۔پاکستان او پی سی ڈبلیو کا فعال رکن ہے اور 1997 میں سی ڈبلیو سی کی توثیق کے بعد سے ایگزیکٹو کونسل میں خدمات انجام دیتا آ رہا ہے۔ پاکستان ہمیشہ معاہدے کے مقاصد کے حصول میں تعمیراتی کردار ادا کرتا رہا ہے۔او پی سی ڈبلیو کی 41 رکنی ایگزیکٹو کونسل میں پاکستان کا دوبارہ انتخاب تنظیم میں پاکستان کے مثبت کردار اور رکن ممالک کے اعتماد کا مظہر ہے۔

کریڈٹ: انڈیپنڈنٹ نیوز پاکستان-آئی این پی