کینیڈا میں پاکستانی ہائی کمشنر محمد سلیم نے کہا ہے کہ بھارتی جارحیت کیخلاف پاکستانی قوم کے عزم، قیادت کی حکمت اور مسلح افواج کی دلیری کو سراہتے ہیں ،مسئلہ کشمیر اقوا م متحدہ سلامتی کونسل کی قراردادوں اور کشمیری عوام کی خواہشات کے مطابق حل ہونا چاہئیے ۔تفصیل کے مطابق پاکستان ہائی کمیشن اوٹاوا میں "یومِ تشکر" منایا گیا جس کا مقصد پوری پاکستانی قوم اور مسلح افواج کو آپریشن "بنیان المرصوص" اور "معرکہ حق" کے دوران ان کی بے مثال قومی یکجہتی اور جرات کو خراجِ تحسین پیش کرنا تھا۔تقریب میں پاکستانی کمیونٹی کے اراکین اور پاکستان سے محبت کرنے والوں کی بڑی تعداد نے شرکت کی۔ اس موقع پر وطن کے دفاع میں جانیں قربان کرنے والے شہدا کے لیے خصوصی دعائیں بھی کی گئیں۔ہائی کمشنر محمد سلیم نے اپنے خطاب میں پاکستانی قوم کے عزم، قیادت کی حکمت اور مسلح افواج کی دلیری کو سراہا۔ انہوں نے بھارتی جارحیت کے خلاف پاکستان کے تحمل اور محتاط ردعمل کو اجاگر کیا اور ان دوست ممالک کا شکریہ ادا کیا جنہوں نے کشیدگی کے خاتمے میں مثبت کردار ادا کیا۔ہائی کمشنر نے جموں و کشمیر کے مسئلے کے پرامن حل کی ضرورت پر زور دیا اور اقوام متحدہ کی سلامتی کونسل کی قراردادوں اور کشمیری عوام کی خواہشات کے مطابق مسئلے کے حل کی اہمیت کو اجاگر کیا۔
کریڈٹ: انڈیپنڈنٹ نیوز پاکستان-آئی این پی