پی ٹی آئی بلوچستان کے صدر داود شاہ کاکڑ ایک ٹریفک حادثے میں شدید زخمی ہو گئے۔ اطلاعات کے مطابق حادثہ کے نتیجے میں گاڑی مکمل طور پر تباہ ہو گئی جبکہ داود شاہ کاکڑ سمیت ان کے ہمراہ سفر کرنے والے کئی کارکنان بھی زخمی ہو گئے۔ حادثہ پیش آنے کے فوری بعد مقامی لوگوں نے امدادی کارروائی کرتے ہوئے زخمیوں کو قریبی اسپتال منتقل کیا۔ہسپتال ذرائع کے مطابق داود شاہ کاکڑ کو متعدد چوٹیں آئی ہیں اور ان کا فوری طور پر علاج جاری ہے۔ دیگر زخمیوں کو بھی طبی امداد دی جا رہی ہے اور ان کی حالت خطرے سے باہر بتائی جا رہی ہے۔ حادثے کی اطلاع ملتے ہی تحریک انصاف کے کارکنان اور مقامی رہنما بڑی تعداد میں اسپتال پہنچ گئے۔ کارکنان نے زخمیوں کی عیادت کی اور ان کی جلد صحتیابی کے لیے دعا کی۔ پولیس اور دیگر متعلقہ اداروں نے حادثے کی تحقیقات شروع کر دی ہیں اور عینی شاہدین کے بیانات بھی قلمبند کیے جا رہے ہیں۔ تحریک انصاف کی قیادت نے حادثے پر افسوس کا اظہار کرتے ہوئے داود شاہ کاکڑ اور دیگر زخمیوں کی جلد صحتیابی کے لیے دعا کی ہے۔ ترجمان پارٹی نے کہا ہے کہ داود شاہ کاکڑ پارٹی کا قیمتی اثاثہ ہیں، ان کی خدمات ناقابلِ فراموش ہیں، ہم ان کے مکمل صحتیاب ہونے تک ان کے ساتھ کھڑے رہیں گے۔

کریڈٹ: انڈیپنڈنٹ نیوز پاکستان-آئی این پی