پنجاب حکومت سیلاب متاثرہ علاقوں میں تعلیمی ادارے ایک ہفتے کیلئے بند رکھنے پر غورکررہی ہے۔ چیف سیکرٹری پنجاب زاہد اختر زمان کی زیرصدارت پی ڈی ایم اے کا اجلاس ہوا جس میں ریلیف کمشنر پنجاب اور ڈی جی پی ڈی ایم اے عرفان علی کاٹھیا شریک ہوئے جب کہ صوبائی وزرا خواجہ سلمان رفیق اور خواجہ عمران نذیر نے ویڈیو لنک کے ذریعے شرکت کی۔اجلاس میں کلینک آن وہیلز کو سیلاب سے متاثرہ اضلاع میں فوری روانہ کرنے کے احکامات دئیے گئے جب کہ متاثرہ علاقوں میں تعلیمی اداروں کو ایک ہفتے کے لئے بند رکھنے پرغور بھی کیا گیا۔ پی ڈی ایم اے اجلاس میں ننکانہ، شیخوپورہ، ٹوبہ ٹیک سنگھ کے دریائی بیلٹ کے علاقوں کو فوری خالی کرانے کی ہدایات کی گئی جب کہ جھنگ اور چنیوٹ کو بچانے کیلئے رواز پل پر شگاف ڈالنے کا فیصلہ کیا گیا۔ اجلاس میں چیف سیکرٹری نیسیلاب سے متاثرہ علاقوں میں ٹینٹ ولیج قائم کرنے، تمام اضلاع کے میڈیکل کیمپس میں ضروری ادویات کی فراہمی یقینی بنانے کی ہدایت کی۔ دوسری جانب پسرور شہر کو درپیش سیلابی صورتحال کے باعث سیالکوٹ میں 29 اور 30 اگست کو تعلیمی ادارے بند رکھنے کا فیصلہ کیا گیا ہے۔ شہر کی دگرگوں حالت اور موجودہ صورتحال کے باعث سیالکوٹ میں 29 اور 30 اگست کو تعلیمی ادارے بند رہیں گے۔ڈپٹی کمشنر کی جانب سے شہر میں جمعہ و ہفتہ کے روز تعلیمی اداروں کی بندش سے متعلق نوٹیفکیشن جاری کردیا گیا ۔

کریڈٹ: انڈیپنڈنٹ نیوز پاکستان-آئی این پی