پنجاب ہیلتھ کئیر کمیشن کی جانب سے صوبہ بھر کے نجی ہسپتالوں کو ہدایات جاری کردی گئیں، تمام نجی ہسپتالوں کو 35 فیصد بستر سیلاب متاثرین کے لئے مختص کرنے کا حکم دیا گیا ہے۔ ہیلتھ کیئر کمیشن کی جانب سے نجی ہسپتالوں کو جاری احکامات میں کہا گیا ہے کہ صوبہ بھر کے تمام نجی ہسپتال سیلاب متاثرین کا مفت علاج کریں گے، نجی ہسپتالوں کی ایمرجنسیز، انتہائی نگہداشت وارڈز سیلاب متاثرین کے لئے 24 گھنٹے فعال رہیں گے۔ نجی ہسپتالوں کو سیلاب سے متاثرہ افراد کو مفت ادویات کی فراہمی کا بھی حکم دیا گیا ہے جبکہ نجی ہسپتالوں کو پانی سے پھیلنے والی بیماریوں کی نگرانی بڑھانے کی بھی ہدایت کی گئی ہے۔ پنجاب کے نجی ہسپتالوں کے داخلی راستوں پر ریت کے تھیلے اور واٹر پمپس نصب کرنا لازمی قرار دیا گیا ہے ، مریضوں کی منتقلی کیلئے مقامی این جی اوز اور ایمبولنسز سیمدد لینے کی بھی ہدایت کی گئی ہے۔ صوبہ بھر کے تمام نجی ہسپتالوں کو بائیومیڈیکل مشینری، وینٹی لیٹرز، ایکسرے اور سی ٹی سکین مشینوں کو بھی فعال رکھنے کا حکم دیا گیا ہے۔ پنجاب ہیلتھ کیئرکمیشن کی جانب سے ہسپتالوں کو جاری مراسلہ میں مزید کہا گیا ہے کہ ہنگامی حالات میں مریضوں کی منتقلی کے لئے انخلا کا پلان تیار کیا جائے۔

کریڈٹ: انڈیپنڈنٹ نیوز پاکستان-آئی این پی